Ntangu fioti tekela kafwa, Yezu wata ti: “Nsangu zi zambote za Kimfumu mbo zisamunu ha m’toto ntsi wam’kaka wa bantu mu kimbangi kwe makanda mamansoni, mboko ha manima nsuka yikwiza.” (Matie 24:14) Mboka bwe salu tsiango tsia samuna mu nza yam’kaka tilendasalamana e? Mu landa tsifwani tsiasashisa Yezu mu ntangu yikeri ha m’toto ntsi.​—Like 8:1.

Bantu tudingaka tamona ku zinzo zawu. Yezu wasongesa milongoki miandi kabwe balenda samunina nzo na nzo. (Matie 10:11-13; Bisalu 5:42; 20:20) Bansamuni bango ba ntete teritware beri bahanaka ya sarila. (Matie 10:5, 6; 2 Bisi-Korente 10:13) Mpila moshi mpe lumbutsi, salu tsieto tsia samuna tsikubamane bubote, mpe kontso tsimvuka tsiena na teritware yi tsisarilaka. Nsalulu yawuyo mbo yitubakisaka mu lungisa m’samu miasatuma Yezu ti ‘twasamuna twa hana kimbangi bo bufwanakane.’​—Bisalu 10:42.

Ngolo tusarilaka mu bwabana na bantu kuma ni kuma ku bena. Yezu mpe wasatushishila tsifwani mbo kerikwesamuni ha mbuka za bantu babingi, ntsiana ha ndeko mamba ma manene peleko ku bulu dieri bakilaka bantu babansoni mamba. (Marke 4:1; Za 4:5-15) Beto mpe mbo tubatshikaka tsimoko na bantu kuma ni kuma ku tubwabanaka nawu​—mu nzila, ha mbuka za nkari, ha mbuka zi vuluzakalaka bantu, peleko mu nzila ya telefone. Mbo tutaka mpe kimbangi kwe bampwaneto ba kartie, batsisalu, balukolo, mpe bishi kanda, tala tsi tubakiri nzila ya sa bo. Mbo tusarilaka ngolo zo zazansoni, miliyo za bantu ha m’toto wam’kaka babakiri nzila yawa “nsangu zambote za mvukulu.”​—Mikunga 96:2.

Ntsia muntu tabanza wulenda zonzela nsangu zambote za Kimfumu kia Nzàmbi na mambote ma kitunatina ku matu e? Kuswekelandi bampwanaku nsangu zawuzi zansayi. Bazonzela zo bunakwa bulenda!

• Ntsia “nsangu zambote” zifweti samunu e?

• Mbangi za Yehova bwe balanzilaka tsifwani tsia Yezu mu salu tsia samuna e?