Bafarize Yezu beri yinaka, mpe musamu beri dingaka ngatu bamukanga. Bawu batâ ti ka fweti’â wasisa mbevo ko mu tilumbu tia Sabala. Tilumbu timosi tia Sabala, Yezu wamona muntu wa fwa meso weri lombaka bima mu nzila. Yandi watâ kwe milongoki miandi: ‘Taleno bwe ngolo za Nzambi zibakisila muntu wu.’ Yezu wavukasa mante mandi na mutoto, wayirika ntebe, mpe watûla ntebe yo ha meso ma muntu wo. Yezu wamutêla: ‘Yenda sukula meso mu tizinga tia Silowe.’ Bakala dio diaye sukula meso, mpe walenda mu mona mbala ya ntete mu luzingu lwandi.

Bantu batomo yituku. Bawu batâ: ‘Ngano wo ni muntu weri vulu zakalaka mu nzila, mpe weri lombaka bima, peleko muntu wufwanane na yandi?’ Muntu wo watâ: ‘Ni meno nabutuka na meso ma fwa!’ Bantu ni beri mu yulaka: ‘Bwe siri mu zibuka meso?’ Bu kabatêla misamu miayôka, bawu bamunata kwe Bafarize.

Muntu wo watâ kwe Bafarize: ‘Yezu ntebe katûririki ha zulu meso mani, mpe kuntêleleke ndie nasukula tidiri. Buna ndie sukulaka meso. Bwawu bu, lenda die nani dia mona.’ Bafarize batâ: ‘Tala ti Yezu wasisi muntu mu tilumbu tia Sabala, lenda diandi ka dilendi’â diatûka kwe Nzambi ko.’ Kâ, bantu bakaka batâ: ‘Tala ti lenda diandi ka diatûkiri’â kwe Nzambi ko, muntu wo ka waketi’â wasa ko.’

 Bafarize batâ mbila bibuti bia muntu wo, mpe babayula: ‘Bwe mwana’eno wuta lenda mu mona bwawu bu?’ Bibuti biandi bunkuta bwa bâ nawu mu bungu ti Bafarize batâ ti muntu ni muntu waketi bâ na timinu mu Yezu mbo baketi mu kuma ku sinagoge. Buna bawu batâ: ‘Ka tuzebi’â ko. Mu yuleno yandi beni.’ Bafarize bayula biyuvu biakaka kwe muntu wo tii bu kabatêla: ‘Misamu miamiansoni mi nzebi mia nilutêlele. Mu bungu dia nti luta lembo bîkila mu kundiyula biyuvu?’ Bafarize batomo baka nkesi, mpe bamulosa ku mbazi.

Yezu waye monekena muntu wo, mpe wamuyula: ‘Ngano timinu tie naku mu Masiya?’ Muntu wo watâ: ‘Mbo nibâ na timinu mu yandi tala ti nzebi yandi ni nani.’ Yezu wamutêla: ‘Meno ni Masiya.’ Yezu musamu wa mbote kayirika. Yandi wawasisa muntu wo, mpe wamubakisa mu bâ na timinu.