Mutinu wakaka wa ku Babilone ni Dariuse; mu kanda dia Bamede kabâ. Dariuse wamona ti Daniele muntu wa nzitukulu wabâ. Buna yandi wasola Daniele mu bâ mfumu ya bisari bia luyâlu lwa Babilone. Bisari biango, Daniele bieri silaka timbanda, mpe badinga mu mu honda. Bawu bazaba ti Daniele Yehova keri sambilaka mbala zitatu mu tilumbu, mpe batâ kwe Dariuse: ‘Ô mutinu, ku fweti bâ musiku wulomba kwe bantu babansoni mu sambilaka kwa nge. Muntu ni muntu wu lembo wa zitisa, bafweti mu losa mu bulu dia ngo-mbulu.’ Dariuse wazolo musiku wo, mpe watûla tiniemo tiandi.

Buna kwa Daniele bu kazaba ti musiku wa môna wabâ kô, wayenda ku nzo’andi. Ha fenetre ya zibuka, Daniele wafukama mpe wasambila Yehova. Bantu beri mu silaka timbanda, bamukotela mu nzo’andi, mpe bamubwana bu keri sambilaka. Bawu bayenda mu ntinu kwe Dariuse mpe batâ: ‘Daniele ka ta tumama ko kwe nge. Nzambi’andi kata sambilaka mbala zitatu mu tilumbu.’ Dariuse, Daniele keri tomo zoloko, mpe ka zolo’â ko ti kafwa. Tilumbu tiatiansoni, yandi wadinga mpila yi kaketi vûkisila Daniele. Kâ, mutinu ka wabâ na lenda ko dia soba musiku wu batûla tiniemo. Buna, yandi walomba kwe bantu bandi mu losa Daniele mu bulu dia ngo-mbulu za miangu.

 Mpimpa yina, Dariuse lwaka lwabâ nandi mu bungu dia Daniele, mpe kalenda ko mu sêka. Mu pari, yandi wayenda mu ntinu ha bulu, mpe watâ mbila Daniele: ‘Ngano Nzambi’aku yikuvûkisi?’

Dariuse wawâ zu. Daniele wabâ. Yandi watâ kwe Dariuse: ‘Mbazi ya Yehova yikengi munwa wa ngo-mbulu, ka zikunsiri’â tima ko.’ Dariuse watomo yangalala! Yandi watâ ti badûkisa Daniele mu bulu. Daniele kabâ na kani na mputa ko mu nitu’andi. Buna mutinu watâ: ‘Loseno bantu bakwikisiri Daniele misamu mu bulu.’ Bu balosa bantu bango mu bulu, ngo-mbulu zabadia.

Dariuse watambika ntumunu yi kwe bantu: ‘Bantu babansoni bafweti tîna Nzambi ya Daniele. Yandi wavûkisi Daniele mu bulu dia ngo-mbulu.’

Ngano Yehova sambilaka bilumbu biabiansoni ntiana Daniele?