Ha manima ma nkotolo ya bimpumbulu, lendi tiyula: ‘Ngano Nzambi wa kabelokelaka lwaka? Mu bungu dia nti misamu mi mitûriri? Ngano bumpumbulu? (terrorisme) a mbo buwâ? Bwe ndendi bêla na bunkuta bwe nani?’ Bibila mvutu za mbote dihanaka mu biyuvu bio.

 Nzambi miangu kayinaka na bumpumbulu. (Mikunga 11:5; Bingana 6:16, 17) Mpe Yezu, timonikisi tia Nzambi, wasemba milongoki miandi bu basarila miangu. (Matie 26:50-52) Ni bu sa ti babingi bayirikaka misamu mia miangu mu nkumbu ya Nzambi, katambilaka nsalulu zawu ko. Diangana, ka wâka tusambulu twawu ko.—Izaya 1:15.

 Nzambi bantu bê mu mpasi kabelokelaka lwaka, na bô batimukaka mu bungu dia bumpumbulu. (Mikunga 31:7; 1 Piere 5:7) Bibila mpe ditâka ti Nzambi mbo kasukisa miangu.—Izaya 60:18.

 Bibila musamu wutulumunaka bumpumbulu dizabikisaka: “Muntu bu wuyâlaka muntu ni mu mu mwisa mpasi.” (Ekleziaste 8:9) Tûka ntama, bantu batumaka basarila bumpumbulu mu mwisa bantu mpasi. Mu bungu dia mpasi zo, bakaka bayizi sarila bumpumbulu mu tinwanina.—Ekleziaste 7:7.

 Nzambi kanisini mu katula bunkuta na miangu, na mu tûla tidzunu ha mutoto. (Izaya 32:18; Mika 4:3, 4) Mbo:

•   Kakatula misamu mitulumunaka miangu. Nzambi mbo kayingasa bimfumu bia bantu mu guvernema’andi yituma nza yayansoni. Ntwarisi ya guvernema yango, Yezu Kristo, mbo kakipa bantu babansoni mu mpila ya mbote, mpe mbo kakatula matimuna na miangu. (Mikunga 72:2, 14) Buna, ka kwena muntu ko wusarila bumpumbulu. Bantu “mbo bayangalala mu bungu dia tidzunu tiatingi.”—Mikunga 37:10, 11.

•   Kamanisa mpasi zazansoni za tulumuna miangu. Nzambi mbo kawasisa kanda diandi mu misamu mia tuluna bumpumbulu, ni zibâ mputa za mu nitu, peleko za ku mutima. (Izaya 65:17; Nzabukusu 21:3, 4) Yandi wakanisina mpe mu vumbula bantu ba fwa, ha mutoto we na tidzunu.—Za 5:28, 29.

 Bibila misamu mia mbote ditâka mu kwikila ti Nzambi mbo kasa tima ntamana. Kâ, lendi tiyula: ‘Mu bungu dia nti Nzambi keka lembo manisina bumpunbulu?’ Mu baka mvutu, tala video ya Mu bungu dia nti Nzambi kata bikila mpasi?