GO KOŊ NI: Itye i limmo kabedo moro ame ogwoko iye ŋec i kom jo kede jammi me kare acon. Polgi tye anen agoro, mogo komgi owawanya oko, mogo bute okene pe. Mogo bute a pirgi tek omumuka oko. Ento, acel i kingi pe tye ginnoro orem iye, kit ame oyiko kede pwod tye anen ducu i yore iyore. “Ite penynyo ŋat ame tye anyutti ni, “Man nyen kato en okene-ca luŋ?” En te gammo ni, “Pe, man orii kato polgi oko, daŋ anaka pe ru oyiko en okene?” Ite penynye ni, “Ce ni obedo gwokke kan aber?” En dok te gammo ni, “Pe ba, man obedo coro yamo kede kot arac. Jo mogo ame cunygi rac obedo temmo me ballo kede rwenynyo oko.” Itwero bedo paro kun iwuru ‘Ŋo ame oyiko kede?’

I yore moro, Baibul tye bala cal gedo me kare aconnono. Obedo buk acon ame orii—kato en okene-ni luŋ. Buke okene me kare acon gire daŋ tye. Ento pol a coc magi me kare acon owewea oko bala cal nyo gedo mogo me kare acon ame butgi mogo doŋ pe. Me apor, koppogo me Cayan ame tye i yigi odwadwanyo oko kede ŋeccogo anyen ame okwedo. Tamgi i kom kop me yotkom pol kare nen bala rac akato kony ame onwoŋo iye oko. Dok pol a coc magi me kare acon bute mogo doŋ orweny oko nyo oballe arac tutwal.

Ento Baibul dok pat. Coyo ocakere mwakki akato 3,500 okato aŋec, ento Baibul pwod tye duc. Dok kadi bed jo obedo lweny iye kun owaŋo, oketo ageŋ iye dok obedo nenno iwaŋ a piny pi mwakki mia mogo ame okato aŋec—kop iye pwod tye duc. Apat kede kobbo ni kare mere doŋ okato oko pi ŋec anyen, Baibul kobo jammi apol me awura ame atimere i anyim.—Nen canduk me “Kare Mere Okato Oko ya Nyen Anyena Kare Ducu?”

Itwero bedo paro ni, ‘Ateteni pwony me Baibul pwod tio naka i karewa-ni?’ Me gammo apenynyono, penyere ni: ‘Pekki areco aŋo ame dano tye a tikere kede i kare-ni? Mene ame doŋ rac akato?’ Itwero tam i kom lweny, balle a kan orumowa, turo cik, nyo camucana. Wek koŋ doŋ onen pwonynyogo a pirgi tek me Baibul. Ka itye inenno, penyere ni, ‘Ka onwoŋo jo kwo alubere kede kit kwo opore magi, lobo onwoŋo pe twero bedo kabedo aber akato?’

MARO KUC

“Tye kede winyo, jo ame kelo kuc, pien obino lwoŋogi otino Obaŋa.” (Matayo 5:9) “I tuŋ baŋwu ka twere, bedu kede kuc baŋ jo luŋ.”—Jo Roma 12:18.

KICA KEDE TIMMO KICA

“Tye kede winyo, jo ame okica, pien obino timogi kica.” (Matayo 5:7) “Di wunu cunywu ŋat acel acel i kom awottere, kun itimo wunu kica i akinawu kenwu i kom balwu. Ka ŋattoro i akinawu tye kede kopporo i kom ŋat ocele, timere kica i kom bal myero bed tye acalo Jeova a otimowu kica.”—Jo Kolocai 3:13, NWT

KWO KARACEL I KUC I KIN ROK KEDE LEB APAPAT

Obaŋa “oketo jo luŋ a rokgi papat ame tye i wi podo kun gin ducu oya i kom dano acel.” (Tic Okwena 17:26) “Obaŋa kara mom poko akina a jo. Kara bo i rok luŋ, ka dano moro lwore, kun timo gin a tye atira, en gire jolo.”—Tic Okwena 10:34, 35.

WORO I KOM LOBO

“Rwot Obaŋa okwanyo dano te keto i poto me Eden, me en pur dok gwoki.” (Agege 2:15) Obaŋa bino “nyoto jo atye a nyoto lobo.”—Nyut a Lakana 11:18.

DAGGO WORO KEDE TIM ME COCO

“Gwokere wunu i woro me lim; pien kwo a dano mom ocuŋ i kom wel lim apol ame en tye kede.” (Luka 12:15) “Cite tim me coco kede tim me caro caro ducu kede woro me lim myero kur lwoŋ nyiŋe i akinawu, mano en aber baŋ jo Obaŋa.”—Jo Epeco 5:3.

BEDO ŊAT AME GENNE KEDE TIC ATEK

“Omito tiyo gin a tye aber i kare luŋ.” (Jo Eburania 13:18) “Akwal jami a jo wek doŋ kwo bedi; ber en ti tic aber kede ciŋe.”—Jo Epeco 4:28.

BER A KONYNYO JO AME MITO KONY

“Jiŋ wunu cuny jo a cunygi toco, kony wunu jo agoro, di cunywu i kom jo ducu.” (1 Jo Tecalonika 5:14) “Kony otino kic kede mon a coggi oto i kom cangi.”—Yakobo 1:27.

Baibul pe ryeo ka kite kwo magi ame opore-ni keken. I yore ame tio, pe pwonywa ka kede cik a yigi laccono keken ento daŋ pwonyowa kede kite me kettogi i tic i kwowa me nino ducu. Ka onwoŋo pol a jo keto i tic pwony ame oryeo malo-nu, pekki a dano onwoŋo pe twero bedo anonok tutwal? Doŋ i ateni, cik a yigi lac me Baibul tio dok akato i kare-ni kato kare moro keken! Ŋo ce doŋ ame pwony me Baibul twero timmo piri i kare-ni?

Aryeko moro ame onwoŋo ryek akato i kin dano okobo ni: “Ryeko Obaŋa nen atir ni tye kakare pi ticcere.” (Matayo 11:19) Pe itwero ye iye? Ryeko me ateteni nen i kit ame i keto kede i tic. Doŋ itwero tam ni: ‘Ka i ateni kop me Baibul tio, piŋo pe myero kel adwoggi abeco i kwona? Romo konynya niŋo i kom pekki ame atye atikere kede i kare-ni?’ Nen koŋ aporroro acel.

Ituŋ baŋ Delphine, b kwo mere onwoŋo opoŋ i tic ame adwoggi mere bup. Me cwercuny, pekki adoŋo areco te bedo kolle akola i kome. Nyare me mwaka apar wie oto. Nyomgi te ket daŋ oko. Lim i ciŋe te ket daŋ oko. En okobo ni: “Onwoŋo doŋ pe aniaŋ i koma kena kena kadi acel—nyara doŋ onwoŋo pe, cwara pe, naka tura daŋ. Acako winynyo ni konya doŋ pe—ginnoro ame nyuto ŋa ame an abedo doŋ pe, gupu te tum i koma ducu, tammoro keken aber pi anyim daŋ onwoŋo pe.”

Anaka onwoŋo Delphine pe ru oneno ateni me kop magi i waŋe: “Kare me kwowa gik ka i mwakki pyerabiro nono, aco ka tekowa pwod tye te tuno pyeraboro nono, akadi bed amannono, mwakki-nono luŋ bedo me can keken, dok daŋ mom ru tum, eka wan ote rwenyo oko.”—Jabuli 90:10.

Delphine oloko tammere i Baibul i kare ame en tye i can. Gin ame Baibul otimo pire tye me wur tutwal. Kit ame pwony adek ame a lubbo-ni bino nyutto kede, jo apol okene daŋ onwoŋo ni Baibul otimo jammi me awura pirgi i kare ame oketo gini tam ame tye iye i tic me cobbo pekki ame ocorogi. Ocako winynyo gini ni Baibul tye bala cal ot nyo gedo me kare acon ame okobo iye i acakki-ca. Pe tye bala buke ame ti dok karegi kato oko. Ce ni man pien oyiko Baibul kede ginnoro okene dok apat? Itamo ni tye kede kop Obaŋa iye—apat kede kop a dano?—1 Jo Tecalonika 2:13.

Twero bedo ni yin daŋ inwoŋo ni kare me kwo cek tutwal dok opoŋ kede pekki. Ka pekki tye a oonyo bura i komi i lokere kwene pi nwoŋŋo kwecuny, cwak kede tam ame genne dok ame itwero jeŋere iye?

Wek koŋ onen yore adek a pirgi tek ame Baibul twero konynyi iye i kwoni. Twero pwonynyi kede kite me

1. geŋere i pekki.

2. cobbo pekki ame ocori.

3. kanynyo pekki mogo ame pe itwero lokko kede tekcuny.

Pwony ame lubo magi bino nyammo kop i kom jammi adek magi.