Ka tye dini moro ame oturo cunyi, iromo nwoŋŋo tek tutwal me genno dini moro okene doki. Ento bed aboŋo akalakala ni tye dini moro ame itwero genno. I kare ame en tye i lobo, Yecu ocoko lwak jo ame ogen dok opwonyogi me kwo alubere kede cik Obaŋa. Olub Kricito me ateni—ame gin jo a tutte me lubbo kite kwo Okricitayo—pwod gire tye. Itwero nwoŋŋogi ikwene?

Estelle, ame okobo i kome i pwony ame okato-ni, okobo ni: “Acako pwonynyo Baibul i kare ame acako kwanno Baibul kede Ocaden a Jeova. Pe otera kare alac me niaŋ Lakana 8:32, ame kwanne ni: ‘Ibino wunu ŋeyo kop me ateni, kop me ateni bino gonynyowu.’”

Ray, ame daŋ okobo i kome con-ni okobo ni: “Kwanno Baibul kede Ocaden a Jeova oweko apwonyo ni Obaŋa pe kede ciŋ i kom pekki a dano. Abedo kede pwoc me nenno ni kadi bed Obaŋa tye kede tyen kop aber me ye ni jammi areco bed tye i kare-ni, en daŋ ocikere me jwayo oko acocok-ki.”

Ŋeye gire ni, pe yot me timmo gin ame tye atir kun pol a jo i lobo-ni pe lubo rwom me kwo ame opore. Ento gire twere. Jo apol mito kony me niaŋ kede ketto i tic gin ame Baibul pwonyo. En oweko Ocaden a Jeova kwano Baibul kede jo milion apol i twok lobo nono aboŋo culloro. Cabit i cabit, jo apol tye a pwonynyo gin ame Baibul ateteni pwonyo. Acalo adwoggi mere, gin tye a nokko cok baŋ Acwecgi kun ogero kwo ame opoŋ kede yomcuny. a

Nino okene ka irwatte kede Ocaden a Jeova, piŋo pe koŋ ipenygi tyen kop oweko gin geno dinigi? Keboro koŋ pwonygi kede kop i komgi. Eka doŋ ite mokko piri keni ka ce tye dini moro ame itwero genno.