KOP AME TYE I POK ŊE | OMALAIKA—GIN TYE ATETENI? PIŊO ŊEYO KOP I KOMGI PIRE TEK
Kit ame Omalaika Twero Konynyi Kede
Omalaika ame ogen tye kede miti tutwal i kom jammi ame timere i kwo a dano dok onywako kede mitkom tutwal i timmo miti a Jeova. I kare ame Obaŋa ocweo lobo, omalaika “owero karacel i yomcuny, dok awobe Obaŋa luŋ ocako redo i yomcuny.” (Yubu 38:4, 7 NWT) Cakere con i tekwaro a dano, omalaika obedo kede miti me ‘nenno’ kop odwarpiny i kom jammi ame onwoŋo bino timere i lobo i anyim.—1 Petero 1:11, 12.
Baibul nyuto ni, wek miti Obaŋa cobere kakare, omalaika kare mogo omio gwok baŋ jo ame woro Obaŋa i yo me ateni. (Jabuli 34:7) Me apor:
-
I kare ame Jeova oreto boma areco me Codoma kede Gomora, omalaika okonyo Lot ame onwoŋo kite atira kede jo paco-mere me ŋwec riŋo oko.—Agege 19:1, 15-26.
-
I kare ame onwoŋo omito nekko awobe adek me Eburania ame onwoŋo bedo i boma acon me Babulon kun obologi i cuny mac ame alyel ager meicel, “Obaŋa ocwao amalaika mere te laro omiro mere ame genne.”—Danieri 3:19-28.
-
I ŋe Danieri ame onwoŋo obedo dano a kite atir bedo i bur eŋato pi dyewor acel, en okobo ni ebwot “pien Obaŋa ocwao amalaika te miyo dog eŋato oko.”—Danieri 6:16, 22.
Omalaika konyo i rabbo amut aber i wi lobo ducu
OMALAIKA OKONYO KACOKERE OKRICITAYO ME KARE ACON
Kare mogo, omalaika ame gin okwena Obaŋa okonyo i tic apapat me kacokere Okricitayo me kare acon ka onwoŋo mitte me cobbo yik a Jeova. Me apor:
-
Amalaika oyabo doggola me ot buc eka te tello okwena ame onwoŋo otweogi iye me medde kede rabbo amut i ot woro Obaŋa.—Tic Okwena 5:17-21.
-
Amalaika okobbi arab amut Pilipo me wot i yo awoto i Gaja kun oya i Jerucalem wek en rab amut baŋ lo moro me Etiopia ame onwoŋo owoto i Jerucalem pi woro Obaŋa.—Tic Okwena 8:26-33.
-
Ame kare Obaŋa oromo pi jo ame mom gin Ojudaya me doko Okricitayo, amalaika onen baŋ cirikale moro me Roma anyiŋe Kornelio i ginanyuta eka te kobbe me lwoŋŋo akwena Petero i paco mere.—Tic Okwena 10:3-5.
-
I kare ame oketo akwena Petero i buc, amalaika moro onen baŋe te kwanynye oko i ot buc.—Tic Okwena 12:1-11.
KIT AME OMALAIKA TWERO KONYNYI KEDE
Mom tye ginnoro ame nyuto ni Obaŋa i kare-ni tye a tic kede omalaika me konynyo jo i yo me taŋo kit acalo okobo kede i Baibul. Cite, adok i kom karewa-ni, Yecu okobo ni: “Dok amut man aber me loc Obaŋa obino rabo i wi podo luŋ, me te bedo caden baŋ rok ducu; icennere agikki bino tuno.” (Matayo 24:14) Anaka onwoŋo iŋeo ni olub Yecu tye a tiyo tic man i te tela omalaika?
Omalaika ŋeye tutwal i konynyo jo ame ogen i tekwaro a dano
Buk me Nyut a Lakana nyuto ni omalaika onwoŋo bino konynyo jo i wi lobo luŋ kede mitkom me pwonynyo kop i kom Obaŋa Jeova kede yikkere pi dano. Akwena Lakana ocoo ni: “Eka ate neno amalaika ocele ame atwarre i dye polo, kun tye kede amut aber ame perakino me araba baŋ jo a bedo i lobo, baŋ rok kede atekere, kede leb kede jo apapat luŋ. Okobo i dwon aloŋo ni, “Lwor wunu Obaŋa, imie wunu kwogo, pien kare mere me ŋolo kop doŋ oromo. Wor wunu ŋat ame oketo polo kede lobo kede nam kede akoŋ.’” (Nyut a Lakana 14:6, 7) Jammi apol ame otimere i kwo nyuto ni omalaika tye a cwakko tic me rabbo amut me Loc Obaŋa i wi lobo ducu i kare-ni. I ateni, akadi abalo acel keken oŋut te lokere baŋ Jeova, ‘yomcuny adwoŋ meicel bedo i kin Omalaika Obaŋa.’—Luka 15:10.
Ŋo ame bino timere ka tic me rabbo amut aber otum? Omalaika ame gin “mony me polo” bino konynyo Yecu, abaka obakki i lwenynyo “lweny me nino adwoŋ mea Obaŋa Won Twer Ducu” i Armagedon. (Nyut a Lakana 16:14-16; 19:14-16) Omalaika atego bino tiyo tic me nekko jo ame oŋolo to i wigi ka Rwot Yecu “bino culo kwor i kom jo ame . . . pyem amut aber i kom Rwot Yecu.”—2 Jo Tecalonika 1:7, 8.
Pi mannono, ŋe ni omalaika tye kede miti i komi. Gin keto tamgi atut tutwal i kom ber bedo a jo ame mito tic pi Obaŋa, dok Jeova otio kedgi tyen apol me jiŋŋo kede gwokko oticcere ame ogen ame tye i lobo.—Jo Eburania 1:14.
Doŋ acalo ŋat acel acel, otye kede tam a pire tek akato me amoka. Obino winynyo eka ote ketto i tic amut aber ame otye a rabbo i wi lobo ducu-ni? Ocaden a Jeova ame tye i kabedo ame ikwo iye bino bedo kede yomcuny me konynyi nwoŋŋo adwoggi abeco i kony ame omalaika Obaŋa atego magi mio.
