Jo a kitti pe ŋweco tic. Akaka mannono, gin nwoŋo mit a tic atek pi nwoŋŋo jammi ame mitte pirgi kede konynyo jo okene—akadi bed tic ame gin tio rwommere piny.

Kadi bed imito nyo pe, kwo opoŋ kede tic. I lobo ame jo apol pe maro tam me tic atek, bedo ŋat a kitti i makko tic konyi.—Arabkop 3:13.

“Apwonyo ni, ka itio tic atek, ibedo kede awaka dok inwoŋo yeŋo i kwo. Kit yeŋo me cuny man opwonya me maro tic. Bedo kede miti me tic bino konynyi daŋ me bedo kede nyiŋ aber.”—Reyon.

CIK A YIE LAC ME BAIBUL: “Ticcoro luŋ atek tye iye agoba.”—Carokop 14:23.

Doŋ neno aber i kom tic kun ilubo tam abeco ame oryeo piny kan.

Bed kede awaka i pwonynyo kite me tic aber. Bed bala itye itiyo ticci me paco, tyekko tic ame omi i ka kwan, onyo tiyo tic okene me kom, ketto cunyi itiyogi. Ka doŋ itwero tiyo ticcoro-ni aber, yeny yo me meddo rwom me ticci—kun itimo oyotoyot nyo aber akato. Ka dironi me tic omedde, ibino nwoŋŋo mit a ticci.

CIK A YIE LAC ME BAIBUL: “Ineno dano ame adiro i ticcere? Dano-nono bino bedo atic ame tio i nyim abaka, en mom bino tic baŋ jo ocele.”—Carokop 22:29.

Bed kede neno abor. Pol kare, ka icobo ticci aber, ikonyo jo okene. Me apor, ka ibedo ŋat a kitti i cobbo ticci me paco, iwaro wi tic ame jo okene me pacowu tye kede.

CIK A YIE LAC ME BAIBUL: “Winyo tye i miyo akato gamo agama.”—Tic Okwena 20:35.

Med rwom me ticci. Akaka yoko tic ayoka, tem tiyo tic akato en nwoŋo myero iti oko. I yore ni, ibino bedo kede twer i kom kwoni—timmo akato, pe ni pien otye adiyi me timmo, ento pien yin iyero me tiyo.—Matayo 5:41.

CIK A YIE LAC ME BAIBUL: “Tic abeco tiye pe pi dic, ento pi mitini.”—Pilemon 14, NWT

Pe ileŋere. Jo a kitti pe obedo onyapo, ento daŋ pe dok otio atek okato kare oko. Nenogi bedo arorom i nwoŋŋo mit a timmo tic atek kede nwoŋŋo kare me weo.

CIK A YIE LAC ME BAIBUL: “Tika ibed kede jami ame opoŋ ciŋi acel keken, kun itye i kuc i cunyi, kato ame ibedo lolle i jami ame opoŋ ciŋi ryoryo, ame daŋ rom aroma i ryemo yo yamo.”—Arabkop 4:6.