ЖАШТАРДЫН СУРООЛОРУ

Эмне үчүн ар жеримди кескилеп, өзүмө зыян келтире берем?

ОЙНОТУУ

Денени кескилөө

Денени кескилөө адаты барлар көбүнчө денесин кандайдыр бир курч нерсе менен атайлап жабыркатышат. Алар андай ишке эмоциялык абалын жеңилдетиш үчүн барышат. Бирок бул өзүнө-өзү зыян келтирүүнүн бир гана түрү. Кээ бирөөлөр денесин кескилесе, башкалар күйгүзөт же ургулайт. Бул макалада, негизинен, денени кескилөө адаты жөнүндө сөз жүрсө да, бул жерде жазылган принциптер ушу сыяктуу башка адат менен күрөшүп жүргөндөргө да пайдалуу.

Өзүңдүн түшүнүгүңдү текшерип, төмөндө жазылгандар туурабы же туура эмеспи ойлонуп көр:

Өзүнүн денесин кескилемей адаты кыздарда гана болот.
Өз денесин кескилөө Кудайдын: «Өлгөн киши үчүн дене мүчөлөрүңөрдү кескилебегиле»,— деген буйругун бузгандыкка жатат (Лебилер 19:28).

Туура жообу:

Туура эмес. Андай адат көбүнчө кыздарда болгону менен, айрым балдардын да өзүн кескилеген же өзүнө дагы башка кандайдыр бир жол менен зыян келтирген учурлары болот.
Туура эмес. Лебилер 19:28де жазылгандар бул макалада айтылган адатка эмес, байыркы учурдагы бутпарас элдердин үрп-адаттарына тиешелүү. Бирок, кандай болбосун, Жараткан Кудайыбыз биздин өз денебизди жабыркатышыбызды каалабайт (1 Корунттуктар 6:12; 2 Корунттуктар 7:1; 1 Жакан 4:8).

Себептери

Айрымдардын өз денесин кескилегенинин себеби эмнеде? Төмөндөгүлөрдүн кайсынысын туура деп эсептейсиң?

Эмоциялык жактан кыйналып, терс сезимдерин басыш үчүнбү?
Өзүнүн өмүрүн кыйыш үчүнбү?

Туура жообу: А. Андай адаты бар адамдардын көпчүлүгү өзүнүн өмүрүн кыюуну каалашпайт. Алар жөн гана жан дүйнөсүн кыйнаган сезимдерден арылгысы келет.

Ошондой жаштардын айрымдарынын айткандарына көңүл бурсаңар.

Селиа: «Мен ошенткенимде кадимкидей жеңилдеп калчумун».

Тамара: «Мага жан дүйнөм ооруп, кыйналганыма караганда денем ооруп, кыйналганым жеңилирээктей сезилчү. Ошон үчүн ошентчүмүн».

Кэри: «Көңүлүм чөккөндөгү абалымды аябай жаман көрчүмүн. Ошондуктан денемди кескилегенде көңүлүмдүн ооруганынын баары денемдин ооруган жерине ооп, алаксып калчумун».

Жэрин: «Денемди кескилеген учурларда тегеректе болуп жаткан нерселердин баарын унутуп койчумун, көйгөйлөрүмдү да ойлобой калчумун. Мага ошонусу жакчу».

Адаттан арылуунун жолу

Мындай адаттан арылууга Жахаба Кудайдан жардам сурап тиленүү чоң жардам берет. Ыйык Китепте: «Бардык түйшүгүңөрдү ага арткыла, анткени ал силерге кам көрөт»,— деп жазылган (1 Петир 5:7).

Кеңеш: Алгач Жахаба Кудайдан жардам сурап кыскача эле тиленсең болот. Убакыттын өтүшү менен «ар кандай жагдайда сооротуучу Кудайга» жүрөгүңдө болгон нерсенин баарын төгө аласың (2 Корунттуктар 1:3, 4).

Тиленүүнү жан дүйнөбүздү убактылуу тынчтандырып коюунун жолу деп эсептебеш керек. Тиленүү — бул: «Мен сага күч берем, жардам берем, сени адилдик боюнча оң колум менен колдойм»,— деп убада берген Жараткан Кудай менен сүйлөшүү (Ышая 41:10).

Ошондой эле денесин кескилөө адаты менен күрөшүп жүргөндөргө ата-энеси же улуураак бирөө менен сүйлөшүү да жардам берет. Ушул кеңештер үч кызга кандайча жардам бергенине токтололу.

Дил маек

Диана (21 жашта)
Кэти (15 жашта)
Лорена (17 жашта)

Ушундай адатыңар канча жашыңарда башталды эле?

Лорена: «Мен ошондо 14 жаштарда болчумун».

Диана: «Мындай адатым 18 жашымда башталган. Денемди күнүгө кескилеген күндөрүм болгон. Бул кээде бир же эки жумага чейин созулчу. Андан кийин бир ай бою жакшынакай эле жүрчүмүн».

Кэти: «Мен ошондо 14 жашта болчумун. Ошол адатым азыр деле кээде кармайт».

Эмнеден улам ошентчү элеңер?

Кэти: «Мен өзүмдү-өзүм жек көрчүмүн. Мага эч ким мени менен дос болгусу келбечүдөй сезилчү».

Диана: «Кээде бир нерсеге кейип же капаланганымда, жаман сезимдерим күчөп отуруп, акыры, көңүлүм таптакыр чөгүп калчу. Анан ошондой сезимдерим күчөй берип, ичимдеги бир чоң „жырткычка“ айланчу. Денемди кескилесем, ал чыгып кетчүдөй сезилчү».

Лорена: «Көңүлүм чөккөндө, ачууланганда же өзүмө-өзүм жакпай кыжырым келгенде ошентчүмүн. Өзүмдү аябай кир сезип, ошондой сезимден арылгым келчү. Кээде болсо өзүмдү ошондой „жазага“ татыктуу деп эсептечүмүн».

Ошенткениңерде жеңилдеп калчу белеңер?

Диана: «Ооба, ошенткенимде үстүмдөгү оор жүктөн арылгандай эле болчумун».

Кэти: «Бул ыйлап алганга эле окшош. Кээ бирлер ыйлагандан кийин жеңилдеп калса, мен ошентип өзүмдүн денемди кескилегенде жеңилдеп калчумун».

Лорена: «Мен муну ичимдеги терс сезимдерге толгон баллонду бир аз тешип койгонго окшоштурчумун. Ал шак эле жарылып кетпесе да, ичимдеги жаман сезимдерим баллондун жели сыңары акырындап чыгып кеткендей болчу».

Ушул адатыңар жөнүндө башкаларга айткандан коркчу белеңер?

Лорена: «Ооба. Башкаларга айтсам, алар мени бир кызыктай адам экен деп ойлоп калат деп коркчумун. Анын үстүнө, башкалардын менин жеке жашоомду билишин каалачу эмесмин».

Диана: «Башкалар мени күчтүү адам деп эсептешчү. Мен алардын мен жөнүндө ошондой ойдо болушун каалачумун. Башкалардан жардам суроону алсыздыктын белгиси деп ойлочумун».

Кэти: «Башкалар мени оорулуу деп ойлоп калса, өзүмдү андан бетер жаман сезмекмин. Анын үстүнө, өзүмдү ушундай мамилеге татыктуумун деп эсептечүмүн».

Токтотконго эмне жардам берди?

Лорена: «Мен эмне болуп жүргөнүмдү апама айттым. Ошондой эле доктурга кайрылдым. Ал мага терс сезимдер менен күрөшкөнгө жардам берди. Бирок андан кийин деле андай адатым бир нече жолу кайталанды. Ошондой учурларда Ыйык Китепти көбүрөөк окуп-изилдегенге аракет кыла бердим, кабар айтуу кызматына катышканымды да токтоткон жокмун. Ушул нерселер мага аябай жардам берди. Албетте, өзүмө карата болгон терс сезимдерден азырынча толугу менен арылбайт болушум керек. Бирок азыр ошондой сезимдер чулгаганда, мурункудай болуп багынып бербейм».

Кэти: «Менден он жаштай улуу бир эже мага өзүнүн мурун кылган бир иши жөнүндө айтып бергенден кийин, мен да ага өзүмдүн көйгөйүмдү айтып бере алдым. Таң калыштуусу, ал да бир кезекте меникиндей адат менен күрөшүптүр. Ошондуктан бул тууралуу ага айткандан корккон жокмун. Андан сырткары, доктурга да кайрылгам. Ал мага да, ата-энеме да менин абалымды жакшыраак түшүнгөнгө жардам берди».

Диана: «Бир жолу бир жубайлардыкына конокко барып, түнөп калдым. Мен алар менен жакын мамиледе болчумун. Күйөөсү жүрөгүмдү бир нерсе өйүп жүргөнүн байкагандыктан, эмне болуп жатканын сурап калды. Жубайы болсо колуман кармап, кичинекей кезимде апам кучактагандай кучактады. Ошондо кармана албай ыйлап жибердим. Ал да мени менен кошо ыйлады. Аларга өзүмдүн көйгөйүм тууралуу айтыш аябай кыйын болду, бирок айтканыма аябай сүйүнөм».

Ыйык Китеп силерге кандайча жардам берди?

Диана: «Ыйык Китептен мындай адат менен күрөшкөнгө өзүмдүн күчүм жетпей турганын, Жахабанын жардамына муктаж экенимди түшүндүм» (Накыл сөздөр 3:5, 6).

Кэти: «Ыйык Китепте жазылгандардын Кудайдын сөзү экенин билгеним аны окуганда кадимкидей сооронуп калууга жардам берет» (2 Тиметей 3:16).

Лорена: «Кийин кайра дагы окуп, ой жүгүртө алышым үчүн Ыйык Китептеги өзүмө тиешелүү аяттарды дептериме жазып алчумун» (1 Тиметей 4:15).

Кайсы аяттар өзгөчө таасир этти эле?

Диана: «Накыл сөздөр 18:1де: „Башкалардан бөлүнгөн өзүмчүл каалоолоруна жетеленет, акылмандыктын баарына каршы чыгат“,— деп жазылган. Кээде элге аралашкым келбей, жалгыз болгум келген учурларда ушул аят мага элден обочолонуу кооптуу экенин эсимден чыгарбаганга жардам берет».

Кэти: «Мага Ыйык Китептеги Матай 10:29, 31-аяттар аябай жагат. Ал аяттарда Иса Жахаба Кудайдын атүгүл бир таранчынын да өлгөнүн билерин айткан. Ал мындай деп да кошумчалаган: „Коркпогула: силер топ таранчыдан да баалуусуңар“. Ушул аяттар Жахабанын мени канчалык баалаарын азыр да эсиме салып турат».

Лорена: «Ышая 41:9, 10до жазылгандар мага аябай жагат. Ал жерде: „Сени четке каккан жокмун... Коркпо, анткени мен сени мененмин... Мен сага күч берем“,— деп жазылган. Жахабанын „күч берем“ деген сөздөрүн окуганда мен күчтүү, урагыс, бекем нерсени, мисалы, таштан курулган бекем дубалды элестетем. Бул аят Жахаба Кудайдын мени жакшы көрөрүнө жана дайыма мени колдоп турарына ынандырып, мага күч-кайрат берет».

Ой жүгүртүү үчүн суроолор

Жардамга муктаж болуп жатканыңда кимге кайрылсаң болот?
Жахаба Кудайга эмне деп кайрылсаң болот?
Стресс болгонуңда же бир нерсеге кабатыр болуп, көңүлүң чөккөндө абалыңды (өзүңдүн денеңди жабыркатпай) жеңилдетүүнүн кандай эки жолу бар?

Мага жаккан аяттар

Кеңеш: Сени Жахабанын жакшы көрөрүнө ынандырган же сага өзүңө жана өзүңдүн кемчиликтериңе тең салмактуу караганга жардам берген аяттарды өзүнчө бир дептерге жазып кой. Ал аяттардагы сөздөрдүн сага кандай тиешеси бар экенин да жазып кой. Диана, Кэти жана Лоренанын жазгандарына көңүл бурсаң.

Римдиктер 8:38, 39

«Бул аяттар, өзүмдү кандай жаман сезбейин, Жахабанын мени жакшы көрөрүн көрсөтүп турат» (Диана).
Забур 73:23

«Ушул сыяктуу аяттар мени жалгыз эмес экениме, Жахаба дайыма жанымда экенине ынандырат» (Кэти).
1 Петир 5:10

«Дароо эле жеңилдеп калбашыбыз мүмкүн; „бир аз азап чегишибиз“ мүмкүн. Бирок Жахаба Кудай бизге бардык кыйынчылыктарды көтөрүп кеткенге күч берет» (Лорена).