Ышая 21:1—17
21 Деңизге окшош чөлгө* чыгарылган өкүм бул:+
Түштүктөн соккон долу шамалдай болуп,Чөлдөн, коркунучтуу жерден, алаамат келатат.+
2 Мага үрөйдү учурган мындай аян берилди:
Чыккынчы чыккынчылык кылып жатат,Кыйратуучу кыйратып жатат.
Алга, Эйлам! Курча, Мадай!+
Мен анын* айынан болуп жаткан азап-кайгынын баарын жок кылам.+
3 Бул аяндан улам мен катуу кыйналдым,+Төрөп жаткан аялдай азап тарттым.
Ушунчалык кыйналгандыктан эч нерсе укпай калдым;Ичим катуу уйгу-туйгу болуп, эч нерсе көрбөй калдым.
4 Жүрөгүм дүкүлдөп, коркконумдан калтырап-титиреп жатам.
Күүгүмдү эңсеп күтчү элем, эми андан коркуп калдым.
5 Дасторкон жайып, отурганга орун камдашсын!
Ичишсин, жешсин!+
Төрөлөр, тургула, калканды* майлагыла!
6 Жахаба мага:
«Бар да, күзөтчү кой. Ал көргөнүн айтып турсун»,— деди.
7 Ошондо күзөтчү эки ат чегилген согуш арабасын,Эшектер чегилген согуш арабасын,Төөлөр чегилген согуш арабасын көрдү.
Ал бүт дитин коюп, жакшылап карап турду.
8 Анан арстандай болуп минтип кыйкырды:
«Оо, Жахаба, мен күнү бою күзөт мунарасында турам,Күн сайын түнү бою ордумдан жылбайм.+
9 Тигине, келатышат,Эки атка чегилген согуш арабасы менен кишилер келатат!»+
Анан катуу үн менен:
«Кыйрады! Бабыл кыйрады!+
Анын оюп жасалган буркандарынын баары жерде талкаланып жатат!» — деди.+
10 Оо, эгиндей бастырылган элим,Кырманымдагы эгин,+Силерге асман аскерлеринин Кудайы Жахабадан, Ысрайылдын Кудайынан, уккандарымды айтып бердим.
11 Думага* чыгарылган өкүм бул:
Мага Сеирден+ бирөө:
«Күзөтчү, таң атарына дагы канча бар?
Күзөтчү, таң атарына дагы канча калды?» — деп кыйкырып жатат.
12 Күзөтчү: «Таң атып келатат, анан кайра түн кирет.
Сурагыңар келсе, сурай бергиле. Дагы келгиле!» — деп жооп берди.
13 Чөлдүү талаага* чыгарылган өкүм бул:
Оо, Дедандын+ кербендери,Силер чөлдүү талаадагы токойго түнөйсүңөр.
14 Тема+ жеринин тургундары,Суусаганды суу менен тосуп чыккыла,Качкынды нан менен тосуп алгыла.
15 Анткени алар кылычтардан, жалаңдаган кылычтан,Тартылган жаадан, айыгышкан согуштан качып келишти.
16 Жахаба мага: «Туура бир жылдын ичинде* Кедар+ бүт даңкынан ажырайт.
17 Кедардын жаа тарткан жоокерлеринин азы эле калат, анткени муну Ысрайылдын Кудайы Жахаба айтты»,— деди.
Шилтемелер
^ Сыягы, байыркы Бабылдын түштүк бөлүгүнө карата айтылган. Ал жакта жыл сайын Евфрат жана Тигр дарыялары ташкындап, жээктерин суу басып калчу.
^ Сыягы, Бабылды билдирет.
^ Бул жердеги калкан деген сөз болочок падышаны билдириши мүмкүн.
^ Мааниси: «жымжырттык». Эдомдун пайгамбарлык мааниге ээ аты.
^ Сыягы, Арабияны билдирет.
^ Же: «Жалданма жумушчу жылдарын эсептегендей, кылдат эсептелген бир жылдын ичинде».
