Падышалар 1-китеп 21:1—29
21 Ушул окуялардан кийин мындай бир окуя болду: Самариянын падышасы Ахаптын ак сарайынын жанында изреилдик+ Наботтун жүзүмзары бар эле.
2 Ахап Наботко: «Сенин жүзүмзарың менин үйүмө жакын эмеспи, ошон үчүн аны мага бер, жер-жемиш отургузайын. Анын ордуна сага алда канча жакшы жүзүмзар берем. Же кааласаң, сатып алайын»,— деди.
3 Бирок Набот: «Ата-бабаларымдан мураска калган жерди кантип бермек элем, Жахаба буга тыюу салбады беле?!»+ — деди.
4 Изреилдик Наботтун: «Ата-бабаларымдан мураска калган жерди бербейм»,— дегенине Ахаптын көңүлү чөгүп, кабагын түйгөн бойдон үйүнө кетти. Үйүнө барганда тамак ичпей, тескери карап жатып алды.
5 Аялы Изабел+ жанына барып: «Эмнеге мынча көңүлүң суз, эмнеге тамак ичпей жатасың?» — деп сурады.
6 Ал: «Изреилдик Наботко: „Жүзүмзарыңды мага сат, же кааласаң, анын ордуна башка жүзүмзар берейин“,— десем, ал: „Жүзүмзарымды бербейм“,— деп койду»,— деди.
7 Изабел ага: «Сен, эмне, Ысрайылдын падышасы эмессиңби?! Туруп, тамак ичип, көңүлүңдү көтөр. Мен сага изреилдик Наботтун жүзүмзарын алып берем»,— деди.+
8 Анан Ахаптын атынан бир нече кат жазып, аларга анын мөөрүн басып,+ Наботтун шаарындагы аксакалдар+ менен аттуу-баштуу кишилерге жөнөттү.
9 Катка: «Орозо жарыялап, Наботту элдин алдына отургузгула.
10 Анан маңдайына күбө катары жүзү кара эки кишини отургузгула. Алар ага: „Сен Кудайга да, падышага да акарат кылдың!“+ — деп жалаа жабышсын.+ Андан кийин аны шаардан алып чыккыла да, таш бараңга алып өлтүргүлө»,+— деп жазды.
11 Наботтун шаарындагы аксакалдар менен аттуу-баштуу кишилер баарын Изабел жазып жибергендей кылышты.
12 Алар орозо жарыялап, Наботту элдин алдына отургузушту.
13 Анан жүзү кара эки киши келип, анын маңдайына отурду да: «Набот Кудайга да, падышага да акарат кылды!»+ — деп элдин алдында ага жалаа жаба башташты. Андан кийин эл аны шаардын сыртына алып чыгып, таш бараңга алып өлтүрдү.+
14 Анан Изабелге: «Набот таш бараңга алынып өлтүрүлдү»,+— деп кабарлашты.
15 Наботтун өлтүрүлгөнүн угары менен Изабел Ахапка: «Изреилдик Набот+ өлдү. Бар да, сага саткысы келбей койгон жүзүмзарын ээлеп ал»,— деди.
16 Изреилдик Наботтун өлгөнүн угары менен Ахап анын жүзүмзарын ээлеп алганы жөнөдү.
17 Ошондо Жахаба тишпилик Илияска:+
18 «Тур да, Самариядагы+ Ысрайылдын падышасы Ахапка бар. Ал азыр Наботтун жүзүмзарында жүрөт, аны ээлеп алганы барды.
19 Ага: „Жахаба мындай дейт: “Өлтүргөнүң аз келгенсип,+ эми анын жерин ээлеп алганы жатасыңбы?”“+ — деп айт. Анан: „Жахаба мындай дейт: “Наботтун канын иттер жалаган жерде сенин каныңды да иттер жалайт”“,+— деп айт»,— деди.
20 Ахап Илияска: «Ии, душманым, акыры мени таптыңбы?!»+ — деди. Илияс мындай деди: «Ооба, таптым. Кудай мындай дейт: „Көз алдымда жаман иштерди өжөрлөнүп кыла бергениң үчүн мен, Жахаба,+
21 сага каргаша жиберип, сени жок кылам. Ысрайылдагы тукумдарыңдын арасынан эркек аттуунун баарын,+ анын ичинде бечараларын да кырам.+
22 Каарымды кайнатканың үчүн, ысрайыл элин күнөөгө түрткөнүң үчүн, Небаттын уулу Жеробам+ менен Ахиянын уулу Баашанын+ тукумдарын кандай кылсам, сенин тукумдарыңды да ошондой кылам“.
23 Изабел жөнүндө болсо Жахаба: „Изабелди Изреил жеринде иттер жейт“,— деди.+
24 Ал сага: „Үйүңдөгүлөрдүн шаарда өлгөнүн иттер жейт, талаада өлгөнү куштарга жем болот.+
25 Аялың Изабелдин+ сөзүнө кирип, Жахабанын көз алдында жаман иштерди өжөрлөнүп кыла берген сендей киши буга чейин болгон эмес.+
26 Сен Жахаба ысрайыл элинин алдынан кууп чыккан аморлуктарга окшоп жийиркеничтүү буркандарга* табынып, өтө жаман иштерди кылдың“,+— деп да айтты».
27 Бул сөздөрдү угары менен Ахап кийимин айрып, таар жамынды. Ал орозо кармап, кайгылуу жүрдү, жатканда да үстүндөгү таары менен жатып жүрдү.
28 Ошондо Жахаба тишпилик Илияска:
29 «Ахаптын менин алдымда моюн сунганын көрдүңбү?+ Ошон үчүн анын үй-бүлөсүнө каргашаны ал тирүү кезде жибербейм, уулунун убагында жиберем»,+— деди.
Шилтемелер
^ Сыягы, бул жерде колдонулган еврей тилиндеги сөз «заң» деген сөз менен тектеш жана жийиркенүү сезимин билдириш үчүн колдонулат.
