Матай 18:1—35
18 Анан шакирттер Исанын жанына келип: «Асман Падышалыгында ким баарынан улук болот?»+ — деп сурашты.
2 Иса бир кичинекей баланы чакырып, ортого тургузду да,
3 мындай деди: «Силерге айтып коёюн, көз карашыңарды толук өзгөртүп, кичинекей балдардай болбосоңор,+ асман Падышалыгынын баталарын албайсыңар*.+
4 Ошондуктан ким өзүн ушул кичинекей баладай төмөн көрсө, ал асман Падышалыгында улук болот.+
5 Ким ушул баладай болгондорду мен үчүн* кабыл алса, ал мени да кабыл алган болот.
6 Ал эми ким мага ишенген, кичинекей баладай болгон ушул кишилердин биринин ишениминин солгундашына себепкер болсо*, анын мойнуна эшек айланткан тегирмен ташын байлап, деңиздин терең жерине чөктүрүп жиберишсе, ага жакшыраак болот.+
7 Адамдарды күнөөгө түрткөнү үчүн* бул дүйнөнү каран түн басат! Негизи, күнөөгө түрткөн нерселер болбой койбойт, бирок алар ким аркылуу болсо, ошонун башына каран түн түшөт!
8 Эгерде сени колуң же бутуң күнөөгө түртсө, аны кесип сал да, ыргытып жибер.+ Эки колуң же эки бутуң менен түбөлүк отко ташталгандан көрө, мунжу же чолок болуп өмүр алганың жакшы.+
9 Эгер көзүң күнөөгө түртсө, аны оюп алып, ыргытып жибер. Эки көзүң менен оттуу гээнага* ташталгандан көрө, бир көзүңдөн айрылып, өмүр алганың жакшы.+
10 Байкагыла, кичинекей балдардай болгон бул кишилердин бирин да кемсинтпегиле, анткени, силерге айтарым, алардын периштелери асманда Атамдын жүзүн дайыма көрүп турушат.+
11 *——
12 Кандай деп ойлойсуңар, 100 кою бар кишинин бир кою жоголуп кетсе,+ 99ун тоого калтырып, жоголуп кеткенин издебей коёбу?+
13 Эгер аны таап алса, ишенип койгула, жоголбогон 99 коюна караганда табылган коюна көбүрөөк сүйүнөт.
14 Ошо сыяктуу эле, асмандагы Атам да кичинекей балдардай болгон ушул кишилердин биринин да жок болушун каалабайт.+
15 Эгер бир тууганың* сага каршы күнөө кылса, бар да, жекеме-жеке сүйлөшүп, айыбы эмнеде экенин айт.+ Эгер сени укса, анда бир тууганыңды туура эмес жолдон кайтарып алган болосуң.+
16 Эгер укпаса, бир же эки кишини ээрчитип бар. Ошентип, ар бир иш 2 же 3 күбөнүн сөзү менен ырасталсын.+
17 Эгерде аларды укпай койсо, жыйналыштагыларга* билдир. Аларды да укпай койсо, анда ал сен үчүн Кудайга ишенбегендердей*+, салык жыйнагандардай болсун.+
18 Ишенип койгула, Кудай асманда эмнени туура деп тапкан болсо, силер да жерде ошону туура деп табасыңар, эмнени туура эмес деп тапкан болсо, силер да ошону туура эмес деп табасыңар*.
19 Буга да ишенип койгула, жерде экөөңөр макулдашып алып, бир маанилүү нерсе жөнүндө сурансаңар, асмандагы Атам аны орундатат.+
20 Анткени кайсы жерде эки же үч адам менин атыман* чогулса,+ мен ошол жерде алардын арасында болом».
21 Анан Петир Исанын жанына барып: «Мырзам, мага каршы күнөө кылган кишини* канча жолу кечиришим керек? Жети жолубу?» — деп сурады.
22 Иса мындай деди: «Сага айтып коёюн, 7 жолу эмес, 77 жолу.+
23 Мына ошондуктан асман Падышалыгын кулдары менен эсептешкиси келген падышага салыштырса болот.
24 Эсептеше баштаганда, ага 10 000 талант* карыз болгон кулду алып келишет.
25 Бирок карызын төлөп бергенге эч нерсеси жок болгондуктан, падыша карызын кайтарып алыш үчүн анын өзүн, аялын, балдарын, колунда болгондун баарын сатканга буйрук берет.+
26 Ошондо кул падышанын бут алдына жыгылып: „Бир аз күтө туруңуз, баарын төлөп берем“,— деп жалбарат.
27 Падышанын боору ооруп, анын карызын кечет да, коё берет.+
28 Ал болсо сыртка чыгып, өзүнө 100 динар* карыз болгон башка кулду издеп таап, аны: „Карызыңды төлө“,— деп муунтуп кирет.
29 Ошондо тиги кул тизелеп: „Бир аз күтө тур, төлөп берем“,— деп жалбара баштайт.
30 Бирок тиги кулдун күткүсү келбей, карызын төлөп бермейин чыкпай турганын айтып, аны түрмөгө каматып коёт.
31 Муну көргөн башка кулдар аябай жаман болуп, капаланышат. Анан падышага барып, бүт баарын айтып беришет.
32 Ошондо падыша жанагы кулду чакыртып алып: „Эй, ырайымсыз кул! Жалынып-жалбарганыңда бүт карызыңды кечпедим беле.
33 Мен сага ырайым кылгандай, сен да тиги кулга ырайым кылбайт белең!“+ — дейт.
34 Анан каары кайнаган падыша бүт карызын төлөп бермейин чыкпай турганын айтып, аны түрмөгө каматып коёт.
35 Анын сыңарындай, эгер бири-бириңерди чын жүрөктөн кечирбесеңер,+ асмандагы Атам да силерге ушундай мамиле кылат».+
Шилтемелер
^ Сөзмө-сөз: «асман Падышалыгына кирбейсиңер».
^ Же: «менин ысмым үчүн».
^ Сөзмө-сөз: «Мүдүрүлтүүчү таштары үчүн».
^ Бул аят Ыйык Китептин айрым котормолорунда бар болсо да, грек тилиндеги байыркы негизги кол жазмаларда кездешпейт. А3 тиркемесин кара.
^ Бул Кудайга чогуу сыйынып, бир динди туткан кишини билдирет.
^ Сыягы, бул жыйналыштын өкүлдөрү менен сүйлөшүшү керектигин билдирет. Салыштыр: Мыйзам 19:16, 17.
^ Сөзмө-сөз: «башка элден болгон адамдай».
^ Сөзмө-сөз: «жерде эмнени байласаңар, ал асманда ага чейин эле байланган болот. Жерде эмнени чечсеңер, ал асманда ага чейин эле чечилген болот».
^ Бул, сыягы, алардын Исанын жолдоочулары, өкүлдөрү катары чогулганын билдирет.
^ Сөзмө-сөз: «бир тууганымды». Бул Кудайга чогуу сыйынып, бир динди туткан кишини билдирет.
^ Б. а. 60 миллион динар. Талант байыркы жүйүттөрдүн салмак жана акча бирдиктеринин эң чоңу болгон. Б. з. 1-кылымында 1 талант күмүштүн же алтындын салмагы 20,4 килограммды түзгөн. Б14 тиркемесин кара.
^ Римдиктердин күмүш тыйыны. 1 динар жумушчунун 1 күндүк эмгек акысы болгон. Б14 тиркемесин кара.
