Малаки 3:1—18
3 «Мына, мен кабарчымды жиберип жатам, ал мага жол даярдайт*.+ Силер издеп жаткан чыныгы Теңир өзүнүн ибадатканасына+ күтүлбөгөн жерден келет. Силер чыдамсыздык менен күтүп жаткан келишим кабарчысы да келет. Ал сөзсүз келет»,— дейт асман аскерлеринин Кудайы Жахаба.
2 «Бирок ал келген күнү ким туруштук бере алат? Ал келгенде, ким чыдай алат? Себеби ал алтын эриткендердин* отундай, кир жуугандардын шакарындай*+ болот.
3 Теңир күмүштү эритип-тазалаган+ кишидей, эритүүчүдөй болуп отурат да, Лебинин урпактарын тазалайт, аларды алтын менен күмүштү эритип-тазалагандай тазалайт. Ошондо алар Жахабага тартуу алып келген таза* эл болот.
4 Жүйүт менен Иерусалимдин элинин тартуусу мурунку күндөрдөгүдөй, байыркы убактагыдай Жахабага жагымдуу болот.+
5 Мен силерге сот жүргүзүш үчүн келем да, тез арада көз байлоочуларды,+ ойноштук кылып жүргөндөрдү, жалган ант бергендерди,+ жалданма жумушчусун,+ жетим-жесирлерди алдагандарды,+ бөтөн жерликке жардам бергиси келбегендерди* соттойм.+ Себеби алар менден коркушпайт»,— дейт асман аскерлеринин Кудайы Жахаба.
6 «Анткени мен Жахабамын, мен өзгөрбөйм*.+ Ошондой эле силер Жакыптын тукумдарысыңар, ошон үчүн да жок болуп кеткен жоксуңар.
7 Силер ата-бабаларыңардын күндөрүнөн тартып эле мыйзам-көрсөтмөлөрүмдү четке кагып, аткарбай келатасыңар.+ Мага кайрылып келгиле, ошондо мен да силерге кайрылам»,+— дейт асман аскерлеринин Кудайы Жахаба.
Бирок силер: «Кайрылып келгидей, эмне, сенден алыстап кеттик беле?» — дейсиңер.
8 Кудай: «Пенде Кудайдыкын уурдашы мүмкүнбү? Силер болсо меникин уурдап жатасыңар»,— дейт.
Силер: «Кандайча сеникин уурдап жатабыз?» — дейсиңер.
«Ондуктар* менен тартууларды алып келбей калдыңар. Меникин ушинтип уурдап жатасыңар.
9 Силер каргышка калдыңар*, себеби меникин уурдап жатасыңар. Бүт эл ушундай кылып жатат.
10 Менин ибадатканамда дайыма тамак-аш болушу үчүн,+ ондуктарыңардын баарын кампага алып келгиле.+ Мени ушинтип сынап көргүлө,— дейт асман аскерлеринин Кудайы Жахаба,— ошондо силер үчүн асман дарбазаларын ачпайт бекем,+ эч нерсеге муктаж болбой калганыңарча, силерге батамды төкпөйт бекем».+
11 «Жериңердин түшүмүн зыянкечтерге* жедирбейм, жүзүмзарыңар да түшүм бербей калбайт»,+— дейт асман аскерлеринин Кудайы Жахаба.
12 «Бардык элдер силерди бактылуу дешет,+ анткени жериңер рахат тартуулаган жер болот»,— дейт асман аскерлеринин Кудайы Жахаба.
13 «Силер мен жөнүндө аябай жаман сөздөрдү айтып жатасыңар»,— дейт Жахаба.
Силер: «Биз сен жөнүндө эмне дедик?» — дейсиңер.+
14 Кудай мындай дейт: «Силер: „Кудайга кызмат кылгандан эч пайда жок.+ Анын алдындагы милдеттерибизди аткаргандан эмне пайда көрдүк? Асман аскерлеринин Кудайы Жахабанын алдында күнөөлөрүбүз үчүн өкүнүп кайгырып жүргөндөн эмне пайда таптык?
15 Ошон үчүн эми текеберлерди бактылуу дейбиз. Жаман иштерди кылгандар гүлдөп жатышат.+ Алар Кудайды сынаганга даап жатышат, бирок жазаланышкан жок“,— деп айтып жатасыңар».
16 Ошол убакта Жахабадан корккондор бири-бири менен сүйлөшүп, өз ара пикирлешип жатышты, Жахаба болсо аларды кунт коюп угуп жатты. Жахабанын алдында андан корккондор жөнүндө, анын ысмы тууралуу ой жүгүрткөндөр* жөнүндө+ эстелик китеп жазылып жатты.+
17 «Мен аларды өзгөчө элим* кылган күнү,+— дейт асман аскерлеринин Кудайы Жахаба,— алар мага таандык болушат.+ Атасы тил алган уулун аягандай эле, мен да аларды аяйм.+
18 Ошондо кайрадан адил адам менен ыймансыз адамдын,+ Кудайга кызмат кылган адам менен кызмат кылбаган адамдын ортосундагы айырманы көрөсүңөр».
Шилтемелер
^ Же: «мен үчүн жол тазалайт».
^ Бул жерде колдонулган еврей тилиндеги сөз алтынды эле эмес, башка металлдарды да эритип-тазалаганга карата колдонулат.
^ Же: «самынындай».
^ Же: «туура иштерди кылган».
^ Же: «бөтөн жерликтин укугун тебелегендерди».
^ Же: «өзгөргөн жокмун».
^ Же балким: «мени каргап жатасыңар».
^ Сыягы, бул түшүмгө зыян келтирген курт-кумурскаларды билдирет.
^ Же балким: «ысмын кастарлагандар».
^ Же: «кымбат баалуу менчигим».
