Лебилер 18:1—30
18 Жахаба Мусага дагы мындай деди:
2 «Ысрайыл элине мындай деп айт: „Мен Жахабамын, силердин Кудайыңармын.+
3 Бир кезде өзүңөр жашап кеткен Мисир жериндегилер кылган иштерди кылбагыла, мен силерди алып бараткан Канаан жериндегилер кылган иштерди да кылбагыла.+ Алардын каада-салттарына карманбагыла.
4 Менин мыйзамдарымды, көрсөтмөлөрүмдү аткаргыла, аларга ылайык жашагыла.+ Мен Жахабамын, силердин Кудайыңармын.
5 Менин осуяттарым менен мыйзамдарымды аткаргыла. Аларды аткарган киши ошонун аркасында тирүү болот.+ Мен Жахабамын.
6 Араңардан эч ким жакын тууганы менен жыныстык мамиледе болуш үчүн жатпасын.+ Мен Жахабамын.
7 Атаң менен жатпа. Энең менен да жатпа. Ал — сенин энең, ошон үчүн аны менен жатпа.
8 Атаңдын аялы менен жатпа.+ Антсең, атаңды шерменде кыласың.
9 Эжең же карындашың менен, атаңдын же энеңдин кызы менен, бир үйдө төрөлгөнсүңөрбү же жокпу, жатпа.+
10 Уулуңдун же кызыңдын кызы менен жатпа. Антсең, өзүң шерменде болосуң.
11 Аталаш эжең же карындашың менен жатпа, себеби ал — сенин эжең же карындашың.
12 Атаңдын эжеси же карындашы менен жатпа. Ал — атаңдын кандаш бир тууганы.+
13 Таежең менен жатпа, анткени ал — энеңдин кандаш бир тууганы.
14 Атаңдын агасынын же инисинин аялы менен жатып, аларды шерменде кылба. Себеби ал — жеңең.+
15 Келиниң менен жатпа.+ Ал — уулуңдун аялы. Ошон үчүн аны менен жатпа.
16 Бир тууганыңдын аялы менен жатпа.+ Антсең, бир тууганыңды шерменде кыласың.
17 Эгер кызы бар аялга үйлөнсөң, анын кызы менен жатпа.+ Ал аялдын уулунун же кызынын кызы менен да жатпа. Алар — анын жакын туугандары. Бул — уятсыздык*.
18 Аялың тирүү кезде үстүнө эжесин же сиңдисин аялдыкка алып, аны менен жатпа.+ Болбосо экөө күндөш болуп калышат.
19 Таза эмес кезинде, айызы келип жатканда, аял менен жатпа.+
20 Башка бирөөнүн аялы менен жатып, өзүңдү арамдаба.+
21 Балдарыңдын бирин да Молекке* арнаба*.+ Кудайыңдын ысмына ошентип сөз тийгизбе.+ Мен Жахабамын.
22 Аял менен жаткандай, эркек менен жатпа,+ бул — жийиркеничтүү иш.
23 Эркек киши жаныбар менен жатып, өзүн арамдабасын. Аял киши да жаныбар менен жатпасын.+ Бул — табияттан тыш нерсе.
24 Ушундай иштердин кайсы биринен улам арамдалып калбагыла, себеби мен силер бараткан жерден кууп чыгара турган элдердин баары ушундай иштерди кылып, арамдалып калышкан.+
25 Ошондуктан алардын жери да арам. Мен ал жердин тургундарын күнөөсү үчүн жазалайм, жер аларды силкип салат.+
26 Силер болсо осуяттарым менен мыйзамдарымды аткаргыла.+ Бул жийиркеничтүү иштердин эч бирин өзүңөр да кылбагыла, араңарда жашаган бөтөн жерлик да кылбасын.+
27 Себеби ал жерде силерге чейин жашагандар ушул жийиркеничтүү иштердин баарын кылгандыктан,+ ал жер арам болуп калган.
28 Эгер ал жерди арамдабасаңар, ал жер силерди силерге чейин жашаган элдердей кылып силкип салбайт.
29 Ким ушул жийиркеничтүү иштердин бирин кылса, өлүм жазасына тартылат.
30 Силерден мурун жашагандардын жийиркеничтүү каада-салттарынын+ айынан таза эмес болуп калбашыңар үчүн, аларга карманбагыла, менин буйруктарымды аткаргыла. Мен Жахабамын, силердин Кудайыңармын“».
Шилтемелер
^ Же: «уятсыз иш; бузулгандык».
^ Байыркы убакта адамдар сыйынган жалган кудай.
^ Же: «курмандыкка чалба».
