Забур 147:1—20
147 Жахты даңктагыла!
Кудайыбызды даңктап ырдаган* жакшы;Аны даңктаган кандай гана жагымдуу, ал даңкка татыктуу!+
2 Жахаба Иерусалимди кайра курат,+Ысрайылдын чачырап кеткен элин кайра чогултат.+
3 Ал жүрөгү жаралангандарды айыктырат,Алардын жараатын таңат.
4 Жылдыздарды санап,Алардын баарын атынан атайт.+
5 Теңирибиз улуу, кудурети күчтүү,+Акылмандыгы* чексиз.+
6 Жахаба мүнөзү жумшактарга жардам берип, аларды жогорулатат,+Ал эми ыймансыздарды жерге кулатат.
7 Жахабага ыраазычылык билдирип ырдагыла,Кудайыбызды арфанын коштоосунда даңктап ырдагыла.
8 Ал асманга булут каптатат,Жерге жамгыр жаадырат,+Тоолорго көк чөп чыгарат.+
9 Жаныбарларга жемин берет,+Кузгундун жем сураган балапандарына азык берет.+
10 Ал аттын күчүнө суктанбайт,+Адамдын күлүктүгүнө таасирленбейт.+
11 Жахаба андан корккондорду,+Анын туруктуу сүйүүсүнө үмүттөнгөндөрдү көрүп кубанат.+
12 Оо, Иерусалим, Жахабаны даңкта,Оо, Сион, Кудайыңды даңазала.
13 Анткени ал дарбазаларыңдын бекиткичтерин бекемдейт,Балдарыңа батасын берет.
14 Жериңди тынчтыкка бөлөйт,+Сени буудайдын мыктысына тойгузат.+
15 Жер жүзүнө буйрук берет,Анын сөзү кабарчыдай тез жетет.
16 Ал жерге ак жүндөй кар жаадырат,+Кыроону күлдөй чачат.+
17 Мөндүрдү* нандын күкүмүндөй эле оңой чачат.+
Анын ызгаарына ким чыдайт?+
18 Ал буйрук берип, мөндүрдү эритет,Шамалын соктуруп,+ сууларды агызат.
19 Жакыпка сөзүн,Ысрайылга көрсөтмөлөрү менен өкүмдөрүн жарыялайт.+
20 Ал башка бир да элге мындай кылган эмес,+Алар анын өкүмдөрү жөнүндө эч нерсе билишпейт.
Жахты даңктагыла!+
