Жылнаама 2-китеп 20:1—37
20 Кийинчерээк мааптыктар,+ Амондун тукумдары+ жана амонимдиктердин* айрымдары Жошапат менен согушканы чыгышты.
2 Ошондо Жошапатка: «Деңиз* тараптан, Эдом жактан,+ сени менен согушканы кара кол келатат. Алар Хазазон-Тамарга, Эн-Гедиге,+ келип калышты»,— деп айтып келишти.
3 Катуу корккон Жошапат Жахабадан акыл сурамакчы болуп,+ бүт Жүйүт аймагындагыларга орозо туткула деп буйрук берди.
4 Ошондо алардын баары Жахабага кайрылыш үчүн чогулушту.+ Алар Жахабадан акыл сураш үчүн Жүйүт жеринин бардык шаарларынан келишти.
5 Анан Жошапат Жахабанын ибадатканасынын жаңы короосунун алдына чогулган Жүйүт менен Иерусалимдин тургундарынын алдында туруп,
6 мындай деди:
«Оо, ата-бабаларыбыздын Кудайы Жахаба!+ Бардык элдердин падышалыктарынын үстүнөн бийлик кылган асмандагы Кудай сен эмессиңби?!+ Күч-кубаттын баары сенин колуңда, сага эч ким туруштук бере албайт!+
7 Оо, Кудайыбыз, бул жердин тургундарын ысрайыл элиңдин алдынан кууп чыгып, алардын жерин досуң Ыбрайымдын тукумуна түбөлүккө берген сен эмессиңби?!+
8 Алар бул жерге отурукташып, сенин ысмыңа арнап ыйык жай куруп:+
9 „Кылычтан кырылабызбы, жазага тартылабызбы, жугуштуу оору же ачарчылык болобу, башыбызга кандай мүшкүл түшпөсүн, ушул ибадаткананын алдында, сенин алдыңда туруп (анткени бул ибадаткана сенин ысмың менен аталат),+ кыйынчылык учурунда жардам сураганыбызда, үнүбүздү угуп, бизди куткара көр“,+— дешкен.
10 Ысрайылдыктар Мисир жеринен чыгып келатканда, сен аларга Амондун тукумдарын, мааптыктарды жана Сеир тоолуу аймагынын+ тургундарын басып алганга жол берген эмессиң. Ошондуктан ысрайылдыктар аларды айланып өтүп, жок кылган эмес. Эми ошол элдердин эмне кылып жатканын карачы.+
11 Алар жакшылыгыбызга жамандык менен жооп берип, бизди сен мураска берген жерден кууп чыкканы жатышат.+
12 Оо, Кудайыбыз, аларды жазалабай коёсуңбу?+ Бизди каптап келаткан бул кара колго каршылык көрсөткүдөй күчүбүз жок. Эмне кыларыбызды билбей,+ баарыбыз сенден жардам күтүп, сени карап турабыз».+
13 Ошол учурда бүт жүйүттөр аялдары, балдары, атүгүл кичинекей балдары менен кошо Жахабанын алдында турушту.
14 Ошондо элдин арасында турган Асаптын урпактарынан болгон Жахазиел деген лебиге Жахабанын ыйык руху таасир эте баштады. Ал Закарыянын, Закарыя Бенаянын, Беная Жиелдин, Жиел Матаниянын уулу болгон.
15 Жахазиел: «Жүйүт менен Иерусалимдин тургундары, Жошапат падыша, баарыңар кулак салгыла! Жахаба силерге мындай дейт: „Каптап келаткан бул кара колдон коркпогула, үрөйүңөр учпасын, анткени алар менен силер эмес, Кудай өзү согушат.+
16 Эртең аларга каршы чыккыла. Алар Сис ашуусу менен келишет. Силер аларга Жеруел чөлүнүн жанындагы өрөөндүн* бүткөн жеринен жолугасыңар.
17 Бул жолкусунда силер согушпайсыңар. Ордуңарда туруп,+ Жахабанын силерди кантип куткарарын карап тургула.+ Жүйүт менен Иерусалимдин эли, коркпогула, үрөйүңөр учпасын.+ Эртең аларга каршы чыккыла, Жахаба силер менен болот“»,+— деди.
18 Ошондо Жошапат Жахабага жерге чейин ийиле таазим кылды. Жүйүт менен Иерусалимдин бүт тургундары да Жахабанын алдында тизелеп, ага сыйынышты.
19 Андан кийин Каат+ менен Корактын урпактарынан болгон лебилер туруп, Ысрайылдын Кудайы Жахабаны болгон үнү менен мактап-даңкташты.+
20 Эртеси баары таң атпай туруп, Текоянын+ жанындагы чөлдү көздөй жөнөштү. Жолго чыгып баратканда, Жошапат баарынын алдына туруп: «Жүйүт эли менен Иерусалимдин тургундары, сөзүмө кулак салгыла! Жахаба Кудайыңарга ишеним арткыла, ошондо бекем болосуңар*. Анын пайгамбарларына ишеним арткыла,+ ошондо ийгиликке жетесиңер»,— деди.
21 Анан эл менен кеңешкенден кийин Жахабаны даңктап ырдап барганга кишилерди дайындады.+ Алар ыйык кийим кийип, куралчан жоокерлердин алдына түшүп: «Жахабага ыраазычылык билдиргиле, анткени анын сүйүүсү түбөлүктүү»,+— деп ырдап барышмак.
22 Алар Жахаба Кудайды кубанычтуу үн менен даңктап ырдай баштаганда, Кудай Жүйүт жерине кол салмакчы болгон Амондун тукумдарына, мааптыктар менен Сеир тоолуу аймагынын тургундарына буктурма койду. Ошондо алар бири-бирин өлтүрө баштады.+
23 Амондун урпактары менен мааптыктар Сеир тоолуу аймагынын+ тургундарына кол салып, аларды кыра башташты. Аларды кырып бүткөндөн кийин бири-бирин өлтүрө башташты.+
24 Жүйүттөр чөлдөгү күзөт мунарасына келип,+ душмандар тарапты карашса, алардын баары, бири калбай, өлүп жатыптыр.+
25 Жошапат менен кишилери олжо алганы барып, толтура буюм-тайым, кийим-кече жана кымбат баалуу буюмдарды табышты. Алар көтөрө албай калганчалык олжо чогултушту.+ Олжо ушунчалык көп болгондуктан, аны 3 күн чогултушту.
26 Төртүнчү күнү болсо Беракак өрөөнүнө чогулуп, Жахабаны алкап-даңкташты*. Ошон үчүн ал жерди Беракак* өрөөнү деп атап коюшкан.+ Ал ушу күнгө чейин ушинтип аталат.
27 Жошапат баштаган Жүйүт менен Иерусалимдин эркектери Иерусалимге кубанып-шаттанып кайтышты, анткени Жахаба аларды жеңишке жеткирди.+
28 Алар Иерусалимге арфа, сурнай+ жана башка кыл аспаптардын+ коштоосунда кирип, Жахабанын ибадатканасына барышты.+
29 Жахаба Кудайдын Ысрайылдын душмандары менен согушканын укканда жер жүзүндөгү бардык падышалыктарды Кудайдан келген коркунуч басты.+
30 Ошон үчүн Жошапат падышанын жеринде бейкуттук өкүм сүрдү. Кудайы аны тегерегиндеги бардык душмандарынан коргоп, тынчтык берди.+
31 Жошапат жүйүт элине бийлик жүргүзө берди. Ал 35 жашында такка отуруп, Иерусалимде 25 жыл падышалык кылды. Энесинин аты Азуба эле, ал Шилхинин кызы болчу.+
32 Жошапат атасы Асанын жолун жолдоду,+ Жахабанын көз алдында туура иштерди кылып, атасынын жолунан чыккан жок.+
33 Бирок сыйына турган бийик жерлерди* жок кылган жок.+ Эл да ата-бабаларынын Кудайына сыйынабыз деп дагы эле бек чече элек болчу.+
34 Жошапаттын жашоосунда болгон башка окуялар башынан аягына чейин Ысрайыл падышалары жөнүндөгү китепте Хананинин+ уулу Жехунун+ жазгандарында баяндалган.
35 Кийинчерээк Жүйүттүн падышасы Жошапат ыймансыз иштерди кылган+ Ысрайылдын падышасы Ахазия менен келишим түздү.
36 Аны менен чогуу Таршышка+ бара турган кемелерди курганга макулдашты. Ошентип, экөө Эсион-Геберде+ кеме кура башташты.
37 Ошондо марешалык Додабайдын уулу Элиезер Жошапатка: «Ахазия менен келишим түзгөнүң үчүн, Жахаба мээнетиңди текке кетирет»,+— деп айтты. Ал алдын ала айткандай эле, кемелер талкаланып,+ Таршышка барбай калды.
Шилтемелер
^ Же балким: «меунимдердин».
^ Сыягы, Жансыз деңиз.
^ Же: «өзөндүн».
^ Же: «туруштук бере аласыңар».
^ Сөзмө-сөз: «Жахабага бата беришти».
^ Мааниси: «бата».
