Даниел 12:1—13
12 Ошол убакта Микеил,+ элиңдин пайдасы үчүн иш кылып жаткан улуу төрө,+ чыгат. Ошондо эл пайда болгондон тартып ошол убакка чейин болуп көрбөгөн оор мезгил келет. Ошол убакта сенин элиң, аты китепке жазылгандардын ар бири,+ куткарылат.+
2 Өлгөндөрдүн көбү тирилет*, кээ бирлери түбөлүк жашаш үчүн, кээ бирлери түбөлүккө маскара болуш үчүн тирилишет.
3 Түшүнүгү барлар асман мейкиндигиндей жаркырашат, көптөрдү адилдиктин жолуна салгандар түбөлүктөн түбөлүккө жылдыздардай жаркырашат.
4 Сен болсо, Даниел, бул сөздөрдү жашыруун сакта, акыркы убакка чейин китепке мөөр басып кой.+ Көптөр бул китепти кылдат изилдеп, чыныгы билим көбөйгөндөн көбөйөт».+
5 Ошондо мен, Даниел, дагы эки периштени көрдүм. Бири суунун берки өйүзүндө, экинчиси аркы өйүзүндө туруптур.+
6 Алардын бири суунун үстүндө турган зыгыр кийимчен кишиден:+ «Ушул укмуштуу окуялардын бүтөрүнө дагы канча бар?» — деп сурады.
7 Ошондо суунун үстүндө турган зыгыр кийимчен кишинин үнүн уктум. Ал эки колун асманга көтөрүп, Түбөлүк Жашаганды оозанып ант берип:+ «Белгиленген бир мезгил, эки мезгил жана жарым мезгил* өтөт. Ыйык элдин күчү кыйратылып бүтөр замат,+ ушунун баары аяктайт»,— деди.
8 Мен уктум, бирок түшүнгөн жокмун.+ Ошондуктан: «Мырзам, ушунун баары эмне менен аяктайт?» — дедим.
9 Ал мындай деди: «Бар, Даниел, себеби бул сөздөр купуя сакталып, акыркы убакка чейин аларга мөөр басылышы керек.+
10 Көптөр өздөрүн тазалашат, агартышат, сыналышат.+ Ыймансыздар болсо ыймансыздыкка жаткан иштерди кылышат, бул сөздөрдү алардын эч кимиси түшүнбөйт, ал эми акылдуулар түшүнөт.+
11 Күнүгө чалынчу курмандык+ токтотулуп, кыйрата турган жийиркенич коюлгандан кийин+ 1 290 күн өтөт.
12 Чыдап, 1 335 күн өткөнгө чейин күткөндөр бактылуу!
13 Сен болсо акырына чейин бекем бол. Сен көз жумасың*, ал эми күндөрдүн акырында үлүшүңдү алыш үчүн кайра турасың*».+
Шилтемелер
^ Же: «Топуракта уктап жаткандардын көбү ойгонот».
^ Б. а. үч жарым мезгил.
^ Сөзмө-сөз: «эс аласың».
^ Же: «өзүңө бөлүнгөн жерде турасың».
