Матай 27:1—66
27 Таң атканда, бардык жогорку дин кызматчылар менен эл аксакалдары Исаны өлтүрүүнүн амалын издеп, өз ара кеңешишти+.
2 Анан аны байлап, алып кетишти да, башкаруучу Пилатка өткөрүп беришти+.
3 Чыккынчылык кылган Жүйүт Исанын өлүм жазасына өкүм кылынганын көргөндө, абийири кыйнагандыктан, отуз күмүш тыйынды+ жогорку дин кызматчылар менен эл аксакалдарына алып келип:
4 «Адил адамга* чыккынчылык кылып, күнөөгө баттым»,— деди+. Алар: «Бизге эмне? Өзүң бил!» — деп коюшту+.
5 Ошондо Жүйүт күмүш тыйындарды ибадатканага ыргытып жиберди да, чыгып кетти. Анан барып, асынып алды+.
6 Жогорку дин кызматчылар болсо күмүш тыйындарды алып: «Бул — кандын баасы, ошондуктан ыйык казынага салганга болбойт»,— дешти.
7 Андан кийин өз ара кеңешип, бөтөн жерликтердин сөөгүн коюш үчүн, ал акчага карапачынын талаасын сатып алышты.
8 Ошондон улам ал жер бүгүнкү күнгө чейин Кандуу-Талаа деп аталат+.
9 Ошентип, Жеремия* пайгамбар аркылуу айтылган бул сөздөр аткарылды: «Алар отуз күмүш тыйынды+ — Ага Ысрайыл уулдарынын айрымдары бычкан бааны — алышты.
10 Анан ал акчаны, Жахаба мага буйругандай, карапачынын талаасын сатып алыш үчүн беришти»+.
11 Иса башкаруучунун алдында турганда, башкаруучу андан: «Сен жүйүттөрдүн Падышасысыңбы?» — деп сурады+. Иса: «Муну өзүң айтып жатасың»,— деп жооп берди+.
12 Бирок жогорку дин кызматчылар менен эл аксакалдары айыптаганда+, ал такыр жооп берген жок+.
13 Ошондо Пилат: «Сага канча айып коюп жатышканын угуп жатасыңбы?» — деди+.
14 Иса эчтеке деп жооп берген жок. Башкаруучу буга абдан таң калды+.
15 Пасах майрамы сайын башкаруучу түрмөдө отургандардын ичинен эл каалаган бирөөнү бошотуп турчу+.
16 Ошол кезде түрмөдө Бараба аттуу атагы чыккан кылмышкер отурган+.
17 Эл чогулганда, Пилат: «Кимисин бошотуп беришимди каалайсыңар: Барабаныбы же Машаяк атанган Исаныбы?» — деп сурады+.
18 Анткени Исаны көрө албастыктан улам+ кармап келишкенин билген+.
19 Андан сырткары, ал сот тактысында отурганда, аялы ага: «Бул адил адамга+ тие көрбө, анткени анын айынан бүгүн түшүмдө аябай кыйналып чыктым»+,— деп айттырып жиберди.
20 Ал эми жогорку дин кызматчылар менен аксакалдар элди үгүттөп, башкаруучудан Барабаны бошотууну+, Исаны болсо өлтүрүүнү суранганга көндүрүштү.
21 Пилат аларга жооп берип жатып: «Экөөнүн кимисин бошотуп берейин?» — деп сурады. «Барабаны»,— дешти алар+.
22 Ошондо ал: «Анда Машаяк атанган Исаны эмне кылайын?» — деп сурады. Ал жердегилердин баары: «Устунга кадалсын!» — деп жооп беришти+.
23 «Эмнеге? Ал эмне жамандык кылды?» — деди Пилат. Бирок тигилер: «Устунга кадалсын!» — деп ого бетер кыйкыра башташты+.
24 Эч майнап чыкпаганын, тескерисинче, ызы-чуунун күчөп баратканын көргөн Пилат суу алып, элдин алдында колун жууду да+: «Мен бул адамдын канынын төгүлүшүнө күнөөлүү эмесмин. Калганын өзүңөр билгиле»,— деп айтты.
25 Буга бүт эл: «Анын каны биздин жана балдарыбыздын мойнунда болсун»,— деди+.
26 Ошондо Пилат аларга Барабаны бошотуп берди. Исаны болсо сабаткандан кийин+ устунга кадатыш үчүн жоокерлерге тапшырды+.
27 Алар Исаны башкаруучунун ак сарайына алып келип, аскер бөлүгүнүн баарын анын жанына чогултушту+.
28 Андан соң аны чечинтип, үстүнө кызыл жабуу жабышты да+,
29 тикенектен таажы өрүп, башына кийгизип, оң колуна камыш таяк карматышты. Анан алдына чөгөлөп: «Саламатсыңбы, жүйүттөрдүн Падышасы!»+ — деп келекелешти+.
30 Алар ага түкүрүп+, колундагы таяк менен башка ура башташты.
31 Мазактап бүтүшкөндөн кийин+ үстүндөгү жабууну алып, өзүнүн сырт кийимин кийгизишти да, устунга кадаш үчүн алып кетишти+.
32 Чыгып баратканда алар киреналык Симон деген кишини жолуктуруп, ага Исанын жаза устунун көтөртүп коюшту+.
33 Голгота+, башкача айтканда, Баш-Сөөк деген жерге келишкенде,
34 алар Исага ачуу зат кошулган шарап беришти+. Бирок ал даамын татып көргөндөн кийин ичпей койду+.
35 Аны устунга кадашкандан кийин+, өкчөмө таш* ыргытып+, сырт кийимин бөлүп алышты+.
36 Анан ошол жерде Исаны күзөтүп отурушту.
37 Ага кандай айып коюлганын көрсөтүү үчүн баш жагына «Бул — жүйүттөрдүн Падышасы Иса» деген жазууну илип коюшту+.
38 Иса менен кошо эки каракчы да устунга кадалды: бири оң жагына, экинчиси сол жагына+.
39 Ары-бери өткөндөр аны кордоп+, баштарын чайкай+:
40 «Эй, ибадаткананы талкалап, кайра үч күндө тургузуп жиберчү киши+, өзүңдү куткарбайсыңбы?! Кудайдын уулу болсоң, жаза устунунан түшүп көрчү!» — деп жатышты+.
41 Жогорку дин кызматчылар да, китепчилер менен эл аксакалдары да аны шылдыңдап+:
42 «Башкаларды куткарып, өзүн куткара албай калдыбы?! Ысрайылдын Падышасы экен+, азыр жаза устунунан түшсүнчү, ошондо ага ишенели+.
43 Кудайга таянчу эмес беле. Эгерде Кудай аны жакшы көрсө, азыр куткарып алсын+, анткени бул: „Кудайдын Уулумун“,— дечү эмес беле»,— дешти+.
44 Аны жанында кадалып турган каракчылар да мазактап жатышты+.
45 Алтынчы саатта* бүт аймакты караңгылык басып+, тогузунчу саатка* чейин каптап турду+.
46 Тогузунчу саат чамасында Иса: «Эли, Эли, лама сабактани?» — деп кыйкырды. Бул сөздөр: «Кудайым, Кудайым, мени эмне үчүн таштап койдуң?» — дегенди билдирет+.
47 Муну ошол жерде тургандардын айрымдары угуп: «Бул Илиясты чакырып жатат»,— дешти+.
48 Алардын бири чуркап барып, соргуч алып келди. Анан аны кычкыл шарапка малып+, таяктын учуна илди да, Исага ичириш үчүн аны көздөй сунду+.
49 Башкалары ага: «Жөн кой. Илияс келип, куткарар бекен, көрөлү»,— дешти+. [Бири найза алып, Исаны капталга сайганда, кан менен суу чыкты.]*+
50 Иса дагы бир жолу катуу кыйкырды да, жан берди*+.
51 Ошол учурда ыйык жайдын* көшөгөсү+ үстүнөн астына чейин айрылып+, экиге бөлүнүп калды. Жер титиреп, аскалар жарылды+.
52 Мүрзөлөр ачылып, өлүм уйкусунда жаткан көптөгөн ыйыктардын сөөктөрү сыртка чыгып калды.
53 Аларды көптөр көрдү. (Иса тирилгенден кийин, мүрзөлөрдүн жанынан өткөндөр ыйык шаарга+ келишти.)*
54 Жүз башы жана аны менен бирге Исаны кайтаргандар жер титирөөнү жана болуп жаткан окуяларды көрүшкөндө, үрөйлөрү учуп: «Бул, чын эле, Кудайдын Уулу болгон экен»,— дешти+.
55 Ушунун баарын алыстан көп аялдар карап турушту+. Алар Исага кызмат кылуу үчүн аны Галилеядан бери коштоп келишкен эле+.
56 Алардын арасында магдалалык Мариям, Жакып менен Жосенин энеси Мариям жана Зебедейдин уулдарынын энеси бар болчу+.
57 Кечке жакын Исанын шакирттеринин бири Жусуп деген ариматаялык бай киши келди+.
58 Ал Пилатка барып, Исанын сөөгүн сурады+. Пилат сөөктү берүүнү буйруду+.
59 Жусуп сөөктү алып, зыгырдан жасалган жогорку сапаттагы таза кездеме менен кепиндеди да+,
60 асканын бооруна оюлган жаңы мүрзөсүнө койду+. Анан чоң ташты тоголотуп келип, мүрзөнүн оозун жапты да, ал жерден кетти+.
61 Ал эми магдалалык Мариям менен дагы бир Мариям ошол жерде калып, мүрзөнүн тушунда отурушту+.
62 Кийинки күнү, тактап айтканда, Даярдык көрүү күнүнүн+ эртеси жогорку дин кызматчылар менен фарисейлер Пилаттын алдына чогулуп:
63 «Мырзабыз, биз жанагы алдамчынын тирүү кезинде: „Үч күндөн кийин+ тирилем“,— деп айтканын эстедик.
64 Ошондуктан мүрзөнү үч күнгө чейин кайтарууга буйрук бер. Шакирттери анын сөөгүн уурдап кетип+, элге: „Ал тирилди“,— деп айтышпасын. Ошондо акыркы калп мурункусунан да жаман болот»,— дешти.
65 Пилат аларга: «Сакчыларды+ алгыла да, барып, өз билгениңердей кайтара бергиле»,— деп койду.
66 Алар барып, мүрзөнүн оозундагы ташка мөөр басып+, мүрзөнү бекитишти да, сакчыларга кайтартып коюшту.
Шилтемелер
^ Сөзмө-сөз: «адил канга».
^ Цитата, чынында, Зах 11:12, 13кө негизделген. Матайдын убагында Жеремия китеби пайгамбарлык китептердин башында турган жана «Жеремия» деген аталыш пайгамбарлык китептердин баарына, анын ичинде Захария китебине да тиешелүү болгон. Салыштыр: Лк 24:44.
^ 1 896-беттеги «Сөздүктү» кара.
^ Түштөн кийинки үчтөр.
^ Түшкү саат он экилер.
^ Сөзмө-сөз: «демин чыгарды».
^ 1 896-беттеги «Сөздүктү» кара.
^ Кашаанын ичинде айтылган окуя кийинчерээк болгон.
