Качкындар менен жер которуп келгендер көбөйүп жаткандыктан, Германияда башка тилдерде кабар айтуу иши кеңири кулач жаюуда. Акыркы 9 айдын ичинде чет тилде 229 топ жана башталгыч топтор түзүлдү. 800дөй жарчы 13 тилди үйрөткөн 30дай тил үйрөнүү курстарына барууда.

Бир туугандар качкындарга кабар айтыш үчүн качкындар лагерлерине барып жатышат. Алар 200дөн ашуун жерге адабият текчесин коюп, 640 000дей адабият таратышты.

 Жетектөөчү Кеңеш 2016-жылдын майынан июлуна чейин атайын өнөктүк өткөрүүгө уруксат берген. Жети өлкөдөн келген, араб тилинде сүйлөгөн 700дөй жарчы Австрияда, Германияда жашаган, араб тилинде сүйлөгөндөргө кабар айтыш үчүн 10 чакты жерге барышты.

Белиздеги «Фаберс Роад Криол» жыйналышындагы 50 жарчы аймактарын жөө кыдырып иштетет. Жарчылардын көбү жакыр турат, бирок берешен болгонго аракет кылышат. Эки жыл мурун бир туугандар үймө-үй кабар айтып жүргөндө чаңы буруксуган жолдордон таап алган тыйындарды чогулта башташкан. Жылдын аягында чогулткан тыйындарды жууп-тазалап, санашат.

Табылган тыйындардын көбү майда тыйындар болсо да (жарым цент), жыл сайын 225 доллардай чогулуп калат. Бир туугандар жарымын Падышалык залынын чыгымын жабууга жумшашса, жарымын бүткүл дүйнөлүк ишке тартуу кылышат.

2016-жылдын 5-мартында башкы башкармалыктын өкүлү Энтони Гриффин келгенде, Бурундинин теократиялык тарыхында маанилүү окуя болду. Атайын жолугушуунун программасы жыйналыштарга өлкөнүн негизги радиостанциясы аркылуу уктурулган. Угармандардын саны орто эсеп менен 4 миллиондой болгон.

Радио аркылуу жакшы күбөлөндүрүү берилип, көптөр ыраазычылык билдиришкен. Радиодо иштеген бир адис: «Силер биз менен дагы иштешишиңер керек экен»,— деген. Ал эми радиостанциянын жетекчиси:  «Көптөрдүн өмүрүн сактап кала турган [ушу сыяктуу программаларды] дагы да чыгара бергиле демекчимин»,— деп жазган. Шаардагы көптөгөн автобустардын, таксилердин айдоочулары жүргүнчүлөрү менен кошо радиодон программаны угушкан.

2016-жылы Непалдагы обочо топтогу бир туугандар Эскерүү кечесин өткөрүүгө даярданып жаткан. Алар ижарага алган жердин жанындагы мектепте чоң концерт болорун укканда эмне кылабыз деп сарсанаа болушкан.

Адатта, концерттерде музыка аябай катуу коюлат. Бир туугандар эртең менен келип, Эскерүү кечеси өткөрүлө турган жерди тазалап жатканда концертти уюштурган киши: «Силер биздин музыкабыздан башка эчтеке уга албайсыңар го дейм»,— деген.

Концерт түштө башталып, музыка даңкылдап чыга баштаган. Бир туугандар адаттагыдан күчтүүрөөк үн күчөткүч орнотушкан. Ошентсе да микрофондорду текшерип жатканда эчтеке угулган эмес. Көңүлү чөккөн бир туугандар жалындуу тилене беришкен. Бир туугандардын көбү келип, Эскерүү кечеси башталарына жарым сааттай калганда күтүлбөгөн жерден музыка токтоп калган. Көрсө, концертке келген балдар ичип алып мушташа кетишиптир. Анан полиция келип, концертти токтотуп, элди таратып жибериптир. Ошентип, бир туугандар Эскерүү кечесин тынчтыкта, жакшынакай өткөрүп алышкан.

Жузеппе Италияда үзгүлтүксүз пионер болуп кызмат кылат. Ал Интернет боюнча кеңеш берген адис болуп үйүнөн иштейт. Былтыр май айында 70тей  кесиптеши менен компаниянын сунуштарын укканы бир жерге чогулушкан. Компаниянын деректири компаниянын мүдөө-максаттарын ишке ашыруу үчүн мыкты веб-сайттарды үлгү катары колдонсо болорун айткан. Анан экрандан бир веб-сайтты көрсөткөн. Жузеппе экрандан jw.org сайтынын башкы бетин көргөндө таң калып калган. Деректир: «Бул — дүйнөдөгү эң мыкты веб-сайт!» — деген. Андан соң jw.org сайтынын өзгөчөлүктөрүн, мисалы, көрүнүшү жагымдуу экенин, маалымат оңой табылгыдай болуп жасалганын айтып берген.

«Веб-сайттын аябай көп тилге которулганына кесиптештерим абдан таң калышты,— дейт Жузеппе.— Сайтты көрүп бүткөндөн кийин жетекчим деректирге жана отургандарга: „Жузеппе Жахабанын Күбөсү  болот“,— деп айтты. Ошондо деректир: „Силердин уюмуңар укмуш уюм экен. Силер дүйнөдөгү уюмдар, компаниялар, ишканалар көз арта тургандай сайт жаратыптырсыңар. Аны колдонууга оңой болгудай кылып жасоого, жаңыртып турууга, майда-чүйдө нерселерине чейин кылдат жасаганга канча эмгек кеткенин элестетип жатам“,— деди. Мен бул сайтты жасоого катышпасам да, сыймыктанып отурдум. Жахабанын Күбөлөрү жөнүндө мурун такыр укпагандарга сонун күбөлөндүрүү берилгенине сүйүндүм. Азыр көптөрү менен Ыйык Китеп жөнүндө сүйлөшүп турам, үчөө изилдей баштады». Жузеппе иштеген компания jw.org веб-сайтын изилдеп жатса, Жузеппе компаниядагы кесиптештери менен Ыйык Китеп жөнүндө сүйлөшүп турат.

Аргентинада жашаган Хорхе деген өспүрүм балага 2010-жылдын башында классташы жакшы кабар айткан. Натыйжада «Ыйык Китепте чынында эмне делет?» китебинин жардамы менен Ыйык Китепти изилдей баштаган. Ошол маалда ал футбол ойночу. Мыкты ойногондуктан футбол клубундагы бир командага алынган. 2014-жылы апрелде Германиядагы бир команда менен футбол ойногонго чакырылган. Мыкты футболчу болсом деп кыялданып жүргөндүктөн сунушту кабыл алган. Европага кетерине бир нече күн калганда агайы мындай деген: «Сен Жахабанын Күбөсү белең? Чет өлкөгө барам деп жашооңду талкалап алба. Мен да жаш кезде Жахабанын Күбөсү болчумун. Мени Азиядагы бир командада ойногонго чакырышкан. Алар мага тоодой убадаларды беришкен. Ишенип алып, үй-бүлөм менен көчүп кеткем. Айткандарынын бирин да аткарышкан  жок. Жаман болуп кайра келдик». Хорхе: «Агайдын айткандары аябай ойлондурду. Европага барбай эле коёюн деп чечтим. 2015-жылы жарчы болуп, көп өтпөй чөмүлдүм»,— дейт.

2015-жылы сентябрда Уганданын Кампала шаарында «Иса Машаяктан үлгү алалы!» деген региондук жыйын өткөрүлгөн. Жыйында Жетектөөчү Кеңештин мүчөсү Марк Сандерсон Ыйык Китептин «Жаңы дүйнө котормосунун» луганда тилинде жарык көргөнүн кулактандырганда, отургандар төбөсү көккө жете сүйүнүшкөн.

Ыйык Китепти изилдеп жүргөн бир аял мындай деген: «Ушундай сонун Ыйык Китепти алганыма аябай сүйүндүм. Ошол кезде шаарга Рим папасы келмек. Чиркөөгө акча көбүрөөк түшсүн деп „баталар“ жазылган китепчени 30 доллардан сатып жатышкан. Байкуш эл бата алгысы келсе да, акчасы жок болгондуктан китепчени сатып ала алган эмес. Мен болсо батаны бепбекер эле алдым. Жахаба жыйынга келгендердин баарына бата берип, Ыйык Китеп белек кылды. Ар ким жүрөгүнөн чыккан тартуусун берди. Жахабанын Сөзүн күн сайын окуп, ал жөнүндө көбүрөөк билген сайын бата алгандай болом. Жахабага Ыйык Китепти бергени үчүн терең ыраазымын!»

www.jw.org сайтына эч ким ишенбеши үчүн, Конгодогу (Киншаса) айрым чиркөөлөрдүн жетекчилери чиркөөгө келгендерге Жахабанын Күбөлөрүнүн адабияттарын жин-перилер басып чыгарат деп айтышкан. Далил катары «www» деген тамгаларды көрсөтүп: «Бул тамгалар Аян китебиндеги 666 деген  санга дал келет»,— дешкен (Аян 13:18). Ушунун айынан Ыйык Китепти изилдеп жүргөндөрдүн айрымдары изилдөөсүн токтотуп коюшкан.

Пионер болуп кызмат кылган бир жубайлар бул жөнүндө тиленип, Ыйык Китепти изилдеп жүргөндөрдү жубайлары менен кошо үйүнө конокко чакырышкан. Үч жубай келген. Тамактан кийин бир туугандар аларга «Жахабанын Күбөлөрү — жакшы кабар жарыялаган уюм» деген тасманы көрсөтүшкөн. Тиги жубайлар биздин адабияттарыбыз жөнүндө айтылгандардын карандай калп экенине ынанышкан. Кийинки жумада бир туугандар конокко келген бир келин менен изилдеп жатышканда, анын күйөөсү, өзү Ыйык Китепти изилдебесе да, 100 доллар берип, бир туугандардан бүткүл дүйнөлүк ишке тартуу кылып коюшун суранган.

Папуа-Жаңы Гвинеянын алыскы бир айылында жашаган бир туугандарда Интернет жок болсо да, алар Падышалыктын жаңы ырларын үйрөнүүнү абдан каалашкан. Ошон үчүн «Мундип» жыйналышы бир байкени жакынкы шаарга жиберген. Шаарды карай ал 2 саат жөө басып, анан автобус менен дагы 2 саат жол жүрүп араң жеткен. Интернет бар жерден жаңы ырлардын сөздөрүн дептерине көчүрүп алып, кайра кайтып келген. Анан Падышалык залына такта коюп, ырларды жазып койгон. Бир туугандардын ар бири ырларды дептерлерине көчүрүп жазып алышкан. Алар Жахабага сыйынууда, дүйнө жүзүндөгү бир туугандарындай болуп, аны даңктап ырдап жатышканына сүйүнүүдө.