Өлүмдү уйкуга салыштырса болот, себеби өлгөн киши, катуу уктап жаткан кишидей эле, эч нерсе сезбейт жана эч нерсе кыла албайт. Бирок Жараткан Кудайдын өлгөндөрдү тирилтүүгө кудурети жетет. Муну далилдеш үчүн ал Иса Машаяк жерде жүргөндө ага өлгөндөрдү тирилткенге күч берген. (Окугула: Насаатчы 9:5; Жакан 11:11, 43, 44.)

Кудай анын эсиндеги адамдарды адилдик өкүм сүрө турган заманда тирилтерин убада кылган. Кудай тирилткенге чейин, алар көрдө болушат. Кудуреттүү Кудай өлгөндөрдү тирилтүүнү абдан каалайт. (Окугула: Аюп 14:14, 15.)

Кудай өлгөндөрдү тирилткенде, алар өздөрүнүн ким экенин биле алышат, үй-бүлөсүн, досторун да таанышат. Алардын денеси чирип кетсе да, Кудайдын аларга жаңы дене бергенге кудурети жетет. (Окугула: 1 Корунттуктар 15:35, 38.)

Салыштырмалуу аз сандагы адамдар асманда жашаш үчүн тирилишет (Аян 20:6). Ал эми көпчүлүгү жер бетинде боло турган Бейиште жашаш үчүн тирилишет. Түбөлүк өмүр сүргөнгө жол ачылып, алар жаңыча жашоо башташат. (Окугула: Забур 37:29; Элчилер 24:15.)