Wantu awonso bavwidi e nkumbu zau. Nga ke diansongi ko, vo Nzambi kakala ye nkumbu? Obokelela muntu muna nkumbu andi i diambu diamfunu vana vena akundi. Nga ke diau adimosi ko divavwanga muna kikundi kieto yo Nzambi?

 Muna Nkand’a Nzambi, Nzambi wavova vo: “Omono i Yave; eyayi i nkumbu ame.” (Yesaya 42:8) Kana una vo ovwidi mpe mazina mayingi nze “Nzambi wa Mpungu-ngolo, “[Mfumu] Yave,” ye “Mvangi,” ozolanga vo asambidi andi bambokelelanga muna nkumbu andi.—Etuku 17:1; Mavangu 4:24; 1 Petelo 4:19.

 Muna nsekola zayingi za Bibila, nkumbu a Nzambi yasonama muna Luvaiku 6:3. E sono kiaki kivovanga vo: “Yamoneka kwa Abarayama, kwa Isaki, yo kwa Yakobo, i Nzambi wa Mpungu-ngolo, kansi muna nkumbu ame a Yave kiazayakana kwa yau ko.”

 Yave i nkumbu a Nzambi isadilwanga muna Kikongo tuka tandu yayingi. Kana una vo akwa ngangu ayingi bezolanga soneka “Yahweh,” Yave i mpila itomene zayakana kwa wantu. E ndambu antete ya Bibila ke yasonamena mu Kikongo ko, kansi muna Kiyibere eki kitangilwanga lunima-lunima. Muna ndinga yayi, e nkumbu a Nzambi mu sono eyi isonekenwanga, יהוה. E sono yá yayi ya Kiyibere mpila eyi itangilwanga YHWH, yiyikilwanga vo Tetragrama.