O Nzambi Lunungunuku Kasadila Muna Sema Lekwa Yawonso?
Mvutu za Bibila
Ve. Bibila kivovanga vo Nzambi wavanga o wantu ye mpila zawonso za bulu ye nti mun’owu wa “makanda mau.” a (Tuku 1:12, 21, 25, 27; Lusengomono 4:11) Kivovanga mpe vo makanda mawonso ma wantu muna mase meto mantete matuka, i sia vo, Adami yo Eva. (Tuku 3:20; 4:1) Bibila ke kivovanga ko vo Nzambi lunungunuku kasadila mu sema e lekwa yawonso. Kansi, mana Bibila kivovanga ngwizani mena ye ngindu za akwa ngangu bevovanga vo muna konso kanda muna ye nkuna waswaswana.
O wantu nkia mambu bekwikilanga?
Awana bekwikilanga vo Nzambi lunungunuku kasadila mu vanga lekwa yawonso, ngindu zaswaswana bekalanga zau muna sasila e diambu diadi. Mun’owu wa nkanda Enciclopédia Britânica, akaka bekwikilanga vo “ Nzambi lekwa ina mu nza kaka kesadilanga mu vaikisa lekwa yankaka.”
Awana bekwikilanga muna lunungunuku belonganga mpe vo:
Vangwa yawonso yamoyo mu se dimosi kaka yatuka.
E kanda dimosi dia vangwa yamoyo dilenda vaikisa kanda diaswaswana.
Nanga Nzambi wazola vo mambu mama mavangamena wauna.
E longi dia lunungunuku ngwizani dina ye malongi ma Bibila?
Awana bekwikilanga muna longi dia lunungunuku bevovanga vo lusansu lwa nsema luna muna nkand’a Tuku ke lwakieleka ko. Kansi, Yesu wasonga vo o lusansu luna muna Tuku lwakieleka. (Tuku 1:26, 27; 2:18-24; Matai 19:4-6) Bibila kivovanga vo, vitila keza ova ntoto, Yesu wazingilanga kuna zulu kumosi yo Nzambi. Muna lusadisu lwandi, o Nzambi wasema “lekwa yawonso.” (Yoane 1:3) Ozevo, e ngindu za sia vo, Nzambi wasadila lunungunuku muna sema vangwa yawonso yamoyo ke zina ngwizani ko ye malongi ma Bibila.
E mpila e nti ye bulu isobelanga avo isilu va fulu kiankaka, nga isonganga vo e longi dia lunungunuku dialudi?
Bibila ke kivovanga ko kana nkumbu nkwa e kanda dimosi dilenda sobela. Kansi ke kivunisanga ko e ngindu za sia vo e makanda mawonso ma bulu ye nti kavanga o Nzambi malenda soba avo misilu va fulu kiankaka. Kanele vo akaka bebadikilanga e nsobani yayi vo lunungunuku, ke ivaikisanga kanda diampa ko.
a E mpila Bibila kisadilanga o mvovo “makanda” yaswaswana ye mpila akwa ngangu besadilanga wo. Nkumbu miayingi, vava akwa ngangu bevovanga vo kanda diampa dinungunukini yovo divaikidi, ediadi disonganga vo nkuna wankaka uvaikidi muna kanda diau dimosi, nze una usadilwanga o mvovo wau muna nkand’a Tuku.
Nanga Oyangalela Mpe Malongi Mama
MALONGI MA SINA MA BIBILA
Aweyi o Nsema Wayantikila?
O lusansu lwa Bibila mu kuma kia nsema o wantu ke betoma lo bakulanga ko, akaka bevovanga vo savu kwandi. Nga tulenda kikilu bunda e vuvu mu mana Bibila kivovanga?
YUVU ITOMA YUVULWANGA
Nga Mbangi za Yave Bekwikilanga vo Nzambi mu Lumingu Lumosi Kasema e Nza?
Nga ozeye wo vo e ngindu za awana bekwikilanga vo e nza mu lumbu sambanu yasemwa ke zina ngwizani ko yo Nkand’a Nzambi?
TU AKI NANI
Lomba Beza Kukingula
Zaya e mvutu za Bibila mu kuma kia kiuvu kiaku, yovo zaya mayingi mu kuma kia Mbangi za Yave.