Yoane wa ntumwa wasoneka mu kuma kia lusansu lwa zingu kia Yesu vo: “On’omwene osidi umbangi, waludi umbangi wandi: ozeye wo vo ludi kavovele, oyeno mpe nwakwikila.”—Yoane 19:35.

 E Nsangu Zambote zasoneka Matai, Maku, Luka yo Yoane zasonekwa ekolo bakala moyo ayingi muna awana bamona mana kavanga Yesu. Kiaki i kuma kiantete tufwete kwikidila mawonso basoneka. Afimpi a mambu bevovanga vo nkand’a Matai mu tezo kia mvu 41 wa tandu kieto wasonekwa, i sia vo mvu nana kaka miavioka tuka Kristu kafwila. Akwa ngangu ayingi bevovanga vo nanga mu mvu mialanda wasonekwa, kansi yau awonso bekwikilanga vo nkanda miawonso mia Sono ya Kingerekia ya Kikristu mu tandu kiantete miasonekwa.

 Awana bamona Yesu ekolo kakala moyo ova ntoto, lufwa lwandi yo lufuluku lwandi, ke bafidisa mpaka ko Nsangu Zambote zasoneka Matai, Maku, Luka yo Yoane. Kele vo diambu dialuvunu basolola, badi dio senzeka. Frederick F. Bruce wa nlongi a universidade wavova vo: “E diambu diasunda o mfunu muna salu kia umbangi kia antumwa i susumuna mana bazaya nkangu; ke bavovanga kaka ko vo: ‘Tu mbangi za mambu mama,’ kansi bavovanga mpe vo ‘una nwiyizayidi yeno kibeni’ (Mavangu 2:22).”