LONGI DIA 44
Nga Nkinzi Miawonso Miyangidikanga Nzambi?
Yave ozolele vo twakala ye kiese muna zingu, kana nkutu muna ntangw’a nkinzi. Kansi, nga nkinzi miawonso mikunyangidikanga? Aweyi tulenda songela vo tuzolanga Yave muna diambu diadi?
1. Ekuma nkinzi miayingi ke miyangidikilanga Yave ko?
Olenda sivika mu zaya vo nkinzi miayingi ke mina ngwizani ko ye malongi ma Bibila yovo mu mabundu maluvunu miatuka. Nkinzi miami milenda kala ngwizani ye mavangu ma mpandu yovo ye longi dialuvunu divovanga vo moyo ke ufwanga ko. E nkinzi miankaka mu mambu ma kimbanzikila yovo muna lukwikilu lwa nzambi a malau miatuka. (Yesaya 65:11) Yave olukisanga asambidi andi vo ‘bayambula simba lekwa kiafunzuka.’—2 Korinto 6:17. a
2. Aweyi Yave kemwenanga nkinzi mivananga nkembo kwa wantu?
Yave okutulukisanga kimana twalembi bwa muna ntambu wa ‘bunda e vuvu muna mpasi muntu.’ (Tanga Yeremiya 17:5.) E nkinzi miankaka mivananga nkembo kwa ayadi yovo kwa masoladi. Miankaka mikembelelanga sinsu ya nsi nze bandeira ye lumbu kia kimpwanza. (1 Yoane 5:21) Nkinzi miankaka nkutu, mikembelelanga nkubika za tuyalu yovo zankaka. Aweyi Yave kemona avo tuvene nkembo kwa wantu yovo kembelela nkubika, musungula zina zinungununanga e ngindu ke zina ngwizani ko ye kani diandi?
3. Nkia mambu malenda kitula nkinzi se miambi?
Bibila kisimanga e fu kia ‘kolwa, nkinzi mialuta tezo [yo] nua vinyu ayingi.’ (1 Petelo 4:3) Muna nkinzi miankaka, wantu ke bekalanga ye volo ko ye bevanganga mambu mambi. Avo tuzolele tatidila kikundi kieto yo Yave, tufwete venga fu yayi ya usafu.
ZAYA DIAKA MANKAKA
Tala una olenda yangidikila Yave yo baka nzengo zambote mu diambu ditadidi lumbu ya nkinzi.
4. Venga nkinzi ke miyangi-dikanga Yave ko
Tanga Efeso 5:10, i bosi, vana e mvutu za yuvu eyi:
-
Nkia ziku tufwete kala kiau vava tubakanga nzengo za kembela yovo lembi kembela nkinzi miankaka?
-
Nkia nkinzi mitoma kembelelwanga muna nsi aku?
-
Adieyi obenze, nga nkinzi miami Yave miyangidikanga?
Muna bong’e nona, nga wakiyuvula kala kana aweyi Nzambi kebadikilanga e nkinzi mia luwutuku? Bibila ke kiyikanga kana selo kimosi ko kia Yave wakembelela lumbu kia luwutuku lwandi, kansi kiyikanga wantu wole ke basadilanga Yave ko, bakembelela lumbu ya luwutuku lwau. Tanga Tuku 40:20-22 ye Matai 14:6-10. I bosi, vana e mvutu za yuvu eyi:
-
Nkia mambu mafwanana mavangama muna nkinzi miami?
-
Landila sono yayi, aweyi Yave kebadikilanga nkinzi a lumbu kia luwutuku?
Kansi, nanga olenda kukiyuvula: ‘Nga Yave okendalala avo nkembelele nkinzi ke mina ngwizani ko ye Bibila?’ Tanga Luvaiku 32:1-8. I bosi, tala e VIDEO yo vana e mvutu za yuvu ilende.
-
Ekuma dinina diamfunu mu zaya mambu meyangidikanga Yave?
-
Aweyi tulenda wo vangila?
Aweyi tulenda zayila e nkinzi ke miyangidikanga Nzambi ko?
-
Nga nkinzi miami nsiku mia Nzambi mikululanga? Toma fimpa e tuku dia nkinzi miami.
-
Nga mivananga zitu wasaka kwa wantu, nkubika yovo sinsu ya nsi? Oyeto tuluta zitisanga Yave yo bunda vuvu vo yandi kaka ofokola mpasi za wantu.
-
Nga fu ye mavangu ma wantu muna nkinzi miami, nsiku mia Yave mekululanga? Tufwete kwamanana twavelela muna mavangu.
5. Sadisa akaka bazitisa nzengo zaku
Dilenda kala diampasi mu zizidila vava akaka bekukomekenanga wakembelela nkinzi ke miyangidikanga Yave ko. Kuna luzindalalu lwawonso ye ngemba, ubazayisa e nzengo zaku. Muna zaya una olenda wo vangila, tala e VIDEO.
Tanga Matai 7:12, i bosi, vana e mvutu za yuvu eyi:
-
Landila e sono kiaki, nga ofwete sima e yitu yaku ana ke besambilanga Yave ko bayambula kembelela e nkinzi miami?
-
Aweyi olenda songela kwa yitu yaku vo okubazolanga, kana nkutu kukembele yau entwadi ko?
6. Yave ozolele vo twakala ye kiese
Yave ozolele vo twavaulanga e ntangwa mu yangalala kumosi ye yitu ye akundi eto. Tanga Kimpovi 8:15, i bosi, vana e mvutu za kiuvu eki:
-
Aweyi e sono kiaki kisongelanga vo Yave ozolele vo twakala ye kiese?
Yave ozolele vo nkangu andi basakananga yo kala ye kiese kumosi ye akaka. Tala e VIDEO mu mona una diambu diadi divangamenanga muna tukutakanu tweto twa mvivu twa nsi zayingi.
Tanga Ngalatia 6:10, i bosi, vana e mvutu za yuvu eyi:
-
Muna vanga “edi diambote” kwa akaka, nga tufwete kembelela e nkinzi miau?
-
Nkia diambu dilenda kutwasila kiese, komekenua mu vana lukau muna lumbu kia nkinzi yovo vana lembi komekenua?
-
Ndonga muna Mbangi za Yave, ezak’e ntangwa bekubikanga nkinzi miakete mu kuma kia wan’au yo kubavana tukau kuna kinsalukisa. Avo wana una yau, nkia mambu mamfunu olenda vanga muna wete diau?
AVO MUNTU UVOVESE VO: “Ke dina mfunu ko mu vava zaya e tuku dia lumbu kia nkinzi. E diambu disundidi o mfunu i kala vamosi ye yitu ye akundi.”
-
Adieyi okumvovesa?
MAMBU MASINA MA LONGI DIADI
Yave ozolele vo twamonanga kiese kiakala vamosi ye yitu ye akundi eto. Kansi, ozolele mpe vo twavenganga nkinzi ke mikunyangidikanga ko.
Nkia Mambu Olongokele?
-
Nkia yuvu tufwete kukiyuvula mu zaya kana vo nkinzi kingandi ke uyangidikanga Yave ko?
-
Aweyi tulenda sadisila yitu ye akundi eto babakula e kuma ke tukembelelanga nkinzi miankaka ko?
-
Aweyi ozayidi wo vo Yave ozolele vo twasakananga yo kala ye kiese?
TALA MPE OMA MALENDE
Tala lumbu yankaka yasikididi ya nkinzi ina Akristu ke balendi kembelela ko.
“Ekuma Mbangi za Yave ke Bekembelelanga Eyaka Lumbu ya Nkinzi ko?” (Longi dina muna jw.org)
Tala kuma yá ikutufilanga mu kwikila vo nkinzi a lumbu kia luwutuku ke uyangidikanga Nzambi ko.
“Ekuma Mbangi za Yave ke Bekembelelanga Lumbu kia Luwutuku ko?” (Longi dina muna jw.org)
Tala una aleke ana bezolanga Yave balenda kunyangidikila muna lumbu ya nkinzi.
Akristu ayingi babaka nzengo zalembi kembelela noele. Aweyi bemonanga mu kuma kia nzengo babaka?
“Eles Encontraram Algo Melhor” (Eyingidilu dia 1 dia Desemba, 2012)
a Muna zaya dina olenda vanga vava wantu bekembelelanga nkinzi miami, tala Mvovo Misasilu 5.
Nanga Oyangalela Mpe Malongi Mama
YUVU ITOMA YUVULWANGA
Ameyi Mevangamanga Muna Longi dia Bibila ye Mbangi za Yave?
Muna programa yayi ya ngovo ya longokela isadilwanga kwa Mbangi za Yave, olenda sadila kwaku konso nsekola ya Bibila. Olenda kwaku bokelesa esi nzo aku yawonso yovo akundi aku ana ozolele.
