Vava kasenzekele fu yambi ya Afarisi, Yesu ye alongoki andi bele kwau. Bakangalele kilometa zayingi yakuna node muna zunga kia Turo ye Sidone kuna Fenisia.

Yesu obakidi e nzo ina keleka, kansi kazolele ko vo wantu bazaya vo mûna kena. Kana una vo i wau, wantu bazeye wo vo mwamu kena. Nkento mosi wa Mungerekia wawutukila muna zunga kiaki, wizidi kwa Yesu, undodokele vo: “E Mfumu, e Mwan’a Davidi, umfwil’e nkenda. O mwan’ame ankento wabakama kikilu kwa nkuya.”—Matai 15:22; Maku 7:26.

I bosi, alongoki bavovese Yesu vo: “Unsindika kenda kwandi kadi ku nim’eto kekwiza kazilanga.” Yesu ubazayisi e kuma kalembele mokena yo nkento ndioyo, ovovele vo: “Kiatumwa kwa wantu ankaka ko kwa mameme mavila ma nzo a Isaele kaka.” Kansi, o nkento okwamanene dodokela Yesu. Wele vana ndambu a Yesu, ofukamene vana ntwal’andi, ovovele vo: “E Mfumu, unsadisa!”—Matai 15:23-25.

Nanga muna zaya kana vo nkento ndioyo lukwikilu lwasikila kena lwau, Yesu osadidi nona muna songa ngindu zambi za Ayuda mu kuma kia wantu a zula yankaka. Ovovele vo: “Ke diansongi ko mu bonga madia ma wana yo tuba mo kwa wan’a mbwa.” (Matai 15:26) Muna sadila mvovo “wan’a mbwa,” Yesu osongele vo ofwilanga zula yankaka e nkenda ana bena vo ke Ayuda ko. Nanga e mpw’andi ye zú dia nding’andi isongele e nkenda zandi.

Vana fulu kia funga makasi, o nkento obakwidi vo Yesu fu kiambi kia Ayuda kayikidi, kuna lulembamu lwawonso ovovele vo: “Ingeta, e Mfumu, kansi o wan’a mbwa nkutu bedianga nkesona zisotokanga vana meza ma mfumu zau.” Yesu omwene vo ntima ambote kena wau, umvovese vo: “E nkento, o lukwikilu lwaku lwanene; yambula wavangama kwa ngeye una ozolele.” (Matai 15:27, 28) Vana vau e dumbelele kisasukidi, kana una vo kena vo ko! Vava o nkento kavutukidi kuna nzo andi, owene dumbelele waleka vana mfulu, ‘o nkuya wamvaikidi.’—Maku 7:30.

Yesu ye alongoki andi bakatukidi muna zunga kia Fenisia, bele kuna simu dia Nkoko a Yodani. Nanga basaukidi nkoko a Yodani kuna node a Mbu a Ngalili yo kota muna zunga kia Dekapole. Vava balweke mo, batombokele kuna mongo, o nkangu ubalende. Batwese kwa Yesu makoka, mpofo ye mababa. Babasidi vana malu ma Yesu, ubawukidi. O nkangu usivikidi muna sivi diadi, bakembelele Nzambi a Isaele.

Yesu osidi e sungididi kiandi kwa muntu mosi una vo mpofo ye nkukumi. Yindula o wonga kena wau o muntu ndioyo vana kati kwa ndonga. Nanga o Yesu wau kabakwidi dio, unkatwidi vana ndonga. Wele yandi va fulu kia yau awole kaka, umvovese dina kekumvanga. Okotese nlembo miandi muna matu ma muntu ndioyo, otawidi o mete, oviakene lubini lwandi. Yesu osengwele meso kuna zulu, i bosi ovovele mvovo mosi una ye nsasa vo “Kakuka.” Vana vau, matu mandi makakukidi, oyantikidi toma vova. Yesu kazolele ko vo wantu bamwanga e nsangu za diambu diadi, kadi ozolele vo wantu bakwikila muna mambu mana yau kibeni bamwene yo wá.—Maku 7:32-36.

O nkuma una Yesu kawukidi wantu usivikisi awonso bena vo, “basivikidi kikilu.” Bavovele vo: “Mawonso kavangidi mambote kikilu. Afwa matu nkutu wisa, e mababa vovesa.”—Maku 7:37.