Tezo kia mvu mosi ye ngonde sambanu ziviokele kala tuka Yoane wa Mvubi kasunzulwila Yesu vo, Mwan’a meme a Nzambi. Tuka Yesu kayantikila e salu kiandi, ayingi muna akwa ntima miambote bakitukidi alongoki andi. Nze Andere, Simone Petelo, Yoane, Yakobo nanga (mpangi a Yoane), Filipo, yo Batolomai (oyikilwanga vo Natanaele). Kuna kwalanda, ankaka diaka bakituka alandi a Kristu.—Yoane 1:45-47.

Owau Yesu okubamene mu sola ntumwa zandi. Yau bekala se akundi andi ketoma zola, osinga kubalonga e salu kiamfunu. Kansi vitila kabasola, Yesu wele kuna mongo, nanga lukufi yo Mbu a Ngalili ye Kafanau. Osambidi fuku wamvimba, nanga muna lomba ngangu ye nsambu za Nzambi. Muna lumbu kialanda, Yesu obokele alongoki andi, osolele 12, bakala se ntumwa zandi.

Yesu osolele mpe alongoki sambanu bayikilu kala ova ntandu, kumosi yo Matai, ona Yesu kabokela vana vevakulwisilwanga e mpaku. Alongoki tanu ankaka basolelo i Yuda (oyikilwanga mpe vo Tadai “wa mwan’a Yakobo”), Simone wa mwisi Kenani, Toma, Yakobo wa mwan’a Alefayo yo Yuda wa mwisi Kereote.—Matai 10:2-4; Luka 6:16.

Yau 12 bekangalanga yo Yesu, otomene kubazaya mpe. Ankaka muna yau, yitu yandi. O Yakobo ye Yoane mpangi zandi. Ankaka bevovanga vo Alefayo mpangi a Yosefe, se dia nsansi dia Yesu. Avo dialudi, ozevo, ntumwa Yakobo wa mwan’a Alefayo, mpangi a Yesu mpe kakala.

Muna kuma kiaki, ke diampasi ko kwa Yesu mu sungamemena nkumbu za ntumwa zandi. Ongeye, olenda sungamene nkumbu zau? Dimosi dilenda kusadisa, i sungamena vo ntumwa zole bena ye nkumbu a Simone, nzole beyikilwanga vo Yakobo, nzole diaka beyikilwanga vo Yuda. Simone ( Petelo) ye mpangi andi Andere, Yakobo (mwan’a Zebedayo) ye mpangi andi Yoane. E ndadani yayi yikusadisa mu sungamena e nkumbu za ntumwa nana. E nkumbu za ntumwa yá zisidi, i (Matai) mvakulwisi a mpaku, (Toma) ona wafila e mpaka, (Natanaele) wabokelwa vana nsanda yo (Filipo) nkundi a Natanaele.

Ntumwa kumi ye mosi esi Ngalili, zunga kiau kimosi yo Yesu. Natanaele musi Kana. Filipo, Petelo yo Andere esi Beteseda. Kuna kwalanda, Petelo yo Andere bayenda zingila kuna Kafanau, nanga i kûna kwa zingilanga Matai. E vata dia Yakobo ye Yoane lukufi dina ye Kafanau, e salu kiau i baka e mbizi za maza. Yuda musi Kereote, yandi wayekola Yesu, nanga yandi kaka i musi Yuda.