Yesu otomene longa e ntumwa zandi e mpila balenda sadila e salu kia samuna e nsangu zambote yo kubatuma nwole-nwole. Kansi, ke diau kaka ko kavangidi. Ubalukisi mu kuma kia atantu, oku vo: “Tala! Inutumini nze mameme vana vena mevua . . . Nuyikenga yo wantu, kadi bekunuyekola kuna mbazi za nkanu, yo kunuzwabula muna masambilu mau. Bekununata kwa ayadi ye atinu muna kuma kiame, muna umbangi kwa yau ye kwa zula.”—Matai 10:16-18.

Alongoki a Yesu bebangikwa kwayingi, kansi Yesu ubasidi o nsilu vo: “Avo banuyekwele, ke nutokani ko kana aweyi yovo adieyi nuvova, kadi dina nuvova divewa kwa yeno muna ntangwa yayina, kadi ke yeno ko nuvova, kansi o mwand’a Se dieno uvova muna yeno.” Yesu ovovele diaka vo: “Mpangi osinga yekola mpangi andi kavondwa, o se mpe mwan’andi, o wana betelamena mase mau yo kubavondesa. Wantu awonso bekunumenga mu kuma kia nkumbu ame, kansi ndiona ozindalala yakuna mbaninu, yandi ovuluzwa.”—Matai 10:19-22.

Wau vo salu kia longa i kiau kisundidi o mfunu, Yesu ubasongele o mfunu wa lungalala ekolo besala e salu kiau. Ovovele vo: “Avo banubangikidi muna mbanza eyi, nutinina muna mbanza yankaka; kieleka inuvovese vo, yavana Mwan’a muntu kekwiza, ke numanisa mbanza zawonso ko za Isaele.”—Matai 10:23.

Ekwe malongi mambote ye lukasakeso kavene Yesu kwa ntumwa zandi 12! Ka lukatikusu ko vo, e mvovo miami mfunu mina mpe kwa awana besala e salu kia samuna nsangu zambote ku nim’a lufwa yo lufuluku lwa Yesu. Tuna ye ziku kiaki kadi Yesu ovovese alongoki andi vo ‘bemengwa kwa wantu awonso,’ ke kwa awana kaka ko bewawana yau muna salu kia samuna nsangu zambote. Vana ntandu, ke vena diambu ko diasonama vo antumwa banatwa kwa ayadi ye atinu muna nkangalu au muna Ngalili ngatu yekolwa kwa yitu yau.

Kieleka, Yesu mambu mesinga vangama ku sentu kavovèle wau kazayisi alongoki andi vo, “yavana Mwan’a muntu kekwiza,” ke befokola samuna nsangu zambote ko muna zunga kiau. Yesu osongele vo alongoki andi ke befokola samuna nsangu za Kintinu kia Nzambi ko, vitila Yesu Kristu wa Ntinu watumwa kwa Nzambi keza mfundisa e nza.

Ekolo besalanga e salu kia samuna e nsangu zambote, antumwa ke bafwete sivika ko avo babangikilu, kadi Yesu ovovele vo: “O nlongoki kasundidi nlongi andi ko, ngatu ntaudi kasunda mfumu andi.” E mvovo mia Yesu miatoma kiá. Wau vo Yesu wabangikwa mu kuma kia samuna nsangu za Kintinu kia Nzambi, alandi andi mpe bebangikwa. Kana una vo i wau, Yesu ubakasakese vo: “Ke nubamoni wonga ko awana balenda vonda e nitu, kansi ke balendi vonda moyo ko; numwena kaka o wonga ona olenda fwasa moyo ye nitu kuna Ngeena.”—Matai 10:24, 28.

Muna diadi, o Yesu i kasisidi mbandu. Vana fulu kia kulula kwikizi kiandi muna Yave, ona wina vo osundidi muna nkuma, Yesu ozizididi yamuna lufwa kondwa kwa wonga. Nzambi wa Mpungu-ngolo kaka olenda fwasa “moyo” a muntu (i sia vo, vuvu kiandi kia zinga diaka kuna sentu) yovo Yave kaka olenda kumfutumuna muna vua moyo a mvu ya mvu. Ediadi dialufiaulwisu kikilu kuna kw’antumwa!

Tala e nona kasadidi o Yesu muna songa e mpila o Nzambi kelunga-lungila alandi andi yo zola kwawonso: “Ke ntietie zole ko zitekwanga muna mpata mosi e? Kieleka, ke vena imosi ko ibua ova ntoto, o Se dieno kalembi wo zaya. Dianu vo, ke numoni wonga ko; oyeno ntietie zayingi nusundidi.”—Matai 10:29, 31.

E nsangu besamuna alongoki a Yesu zisinga vambanesa esi nzo, akaka muna nzo betambulwila zo akaka ke betambulwila zo ko. Yesu osasidi vo: “Ke nuyindula ko vo luvuvamu ngizidi sia ova nza.” Kieleka, unkabu divavanga kwa muntu mu tambulwila e ludi kia Nkand’a Nzambi kele vo esi nzo andi ke bena mu ludi ko. Yesu ovovele diaka vo: “Konso ona oluta zola se yovo ngudi andi ke mu mono ko, kafwene kala nlongoki ame ko; ye konso ona oluta zola mwan’andi ayakala yovo ankento ke mu mono ko, kafwene kala nlongoki ame ko.”—Matai 10:34, 37.

Kansi, akaka betoma tambula alongoki andi. Yesu ovovele vo: “Konso ona ovana kana nkutu kopo dimosi dia maza manzizi kwa mosi muna awaya andwelo wau vo nlongoki, kieleka inuvovese wo vo, ke vidisa nkutu nsendo andi ko.”—Matai 10:42.

Ekolo batomene longwa kwa Yesu, lukiswa yo kasakeswa, antumwa bele “muna mavata mawonso ma zunga, bele samuning’e nsangu zambote, yo wuka mbevo mwawonso.”—Luka 9:6.