Vava esi Nazarete bavavidi kumvonda, Yesu wele kuna Kafanau, lukufi ye Mbu a Ngalili, uyikilwanga mpe vo “yanga dia Ngenesarete.” (Luka 5:1) Ediadi dilunganese ungunza wa nkand’a Yesaya uvovanga vo, esi Ngalili bena vana mbu bamwene ntemo ayingi.—Yesaya 9:1, 2.

Muna Ngalili, Yesu okwamanene samuna vo, “Kintinu kia zulu kifinamene.” (Matai 4:17) Yesu osolwele alongoki yá. Bateka kangala yandi, kansi vava batuka kuna Yuda, bavutukila salu kiau kia lowa mbizi. (Yoane 1:35-42) Eyayi i ntangwa bafwete kala kumosi yo Yesu kimana kabalonga una besinga sadila e salu kia samuna e nsangu zambote vava kevutuka kuna zulu.

Ekolo Yesu kekangalanga vana mbel’a mbu, omwene Simone Petelo ye mpangi andi Andere bekubikanga makonde ye akundi au. Yesu wele vana bena, okotele muna nzaz’a Petelo, umvovese bavavuka vana seke. Vava bavavukidi, Yesu ofongele, oyantikidi longa oma ma Kintinu kwa nkangu una vana seke.

I bosi, Yesu ovovese Petelo vo: “Nunguna nzaza vana kati, nwaleka makonde meno, nwabaka e mbizi.” Petelo ovutwidi vo: “E Mfumu, o fuku wawonso tusadidi yeto ke tubaki má, kansi muna diambu diaku ileka makonde.”—Luka 5:4, 5.

Balekele makonde mau, babakidi ulolo wa mbizi yavana makonde mayantikidi tiazuka. Vana vau, babokele akundi au muna nzaza ina lukufi, kimana babasadisa. E nzaza zau zole zizele ye mbizi, ziyantikidi dimuka mu kuma kia zitu. Vava kamwene ediadi, Petelo ofukamène Yesu yo vova vo: “E Mfumu, katuka kwaku vava ngina, kadi i nsumuki kwame.” Yesu umvutwidi vo: “Kumoni wonga ko. Tuk’omu unu wantu obaka.”—Luka 5:8, 10.

Yesu ovovese Petelo yo Andere vo: “Nwiz’andandi, ikunukitula se abaki a wantu.” (Matai 4:19) Obokele diaka abaki a mbizi wole, Yakobo yo Yoane, wan’a Zebedayo. Oyau mpe batambulwidi lembi katikisa. Muna kuma kiaki, yau yá bayambwidi e salu kia baka e mbizi, bakitukidi alongoki antete a Yesu.