Dia ludi vo okalanga ye kiese kia wá e nsangu zambote. Vena ye nsangu zambote mu kuma kiaku yo wantu ana otoma zolanga.

E nsangu zazi zambote zasonama muna Nkand’a Nzambi, nkanda una Yave wa Nzambi, wa Mvangi a nsema kasonekesa tuka mvu miayingi. Muna nkanda wau, tuvovela nkanda yá mina muna Nkand’a Nzambi, mina ye nsangu zambote mu kuma kia yeto awonso. E nkanda miami miyikilwanga muna nkumbu za wantu ana Nzambi kasola mu soneka mio: Matai, Maku, Luka ye Yoane.

Ndonga beyikilanga o tusansu tuna muna nkanda miami vo, Nsangu Zambote. Muna nkanda miami, mwasonama e nsangu zambote mu kuma kia Yesu, yandi i muntu ona Nzambi kasadila muna vuluza wantu, yandi mpe i Ntinu muna Kintinu kia Nzambi kuna zulu, yandi otwasa e nsambu za kwele mvu kwa wantu awonso bekwikilanga muna yandi.—Maku 10:17, 30; 13:13.

Olenda kiyuvula, ekuma o Nzambi kasonekesena kwa wantu yá o lusansu lwa zingu kia Yesu ye malongi mandi?

Nzambi diambote kavanga muna sola wantu yá mu soneka man’o Yesu kavova yo vanga. Tala e nona eki: Yindula wantu yá batelamene vana ndambu a nlongi otomene zayakana. Wantete otelamene ku ntwal’a nlongi ndioyo, mvakulwisi a mpaku. Wanzole wina kuna lunene, ngang’a mawuku. Wantatu, wina kuna lumonso, mbaki a mbizi za maza ye nkundi a nlongi ndioyo. O muntu wa nyá, otelamene kuna nima, mwan’a toko kwandi, oyandi tala kaka ketalanga. Yau awonso wantu ambote, kansi e ngindu yovo makani mau maswaswana. Avo yau awonso basonekene o mambu mana o nlongi kavovele yo vanga, konso muntu osoneka muna mpil’andi dina kamwene yo wá. Vava tutanga tusansu twatu twawonso, ke tuvilakani ko vo konso muntu  muna yau una ye kuma kia sikila kasonekene e diambu. Ediadi dikutusadisa mu toma bakula o mambu mawonso o nlongi kavovele yo vanga. E nona kiaki, kisongele e nluta mina tulenda baka wau o Nzambi kasadila wantu yá mu soneka lusansu lwa Yesu wa Nlongi Anene.

Yambula twavovela diaka e nona kiaki: O mvakulwisi a mpaku ozolele tunta e sungididi kia kanda dia Ayuda, osonekene malongi yo mambu muna mpila ina ilenda sadisila nkangu wawonso. Vo i ngang’a mawuku, otomene vovela una e mbevo ye avanguki bawukilu. Ka sonekene mawonso ko nze una o mvakulwisi a mpaku kavangidi, yovo osonekene mo mu mpila yaswaswana. Vo i nkundi a nlongi, otomene vovela e mpila ina o Yesu katelanga o mambu ye fu yandi yambote. Vo i mwan’a toko, okufikidi o lusansu lwandi. Kansi, mawonso mana konso muntu mu yau kasonekene ma ludi. E nona kiaki kisongele vo, o lusansu lwa zingu kia Yesu lwasonekwa kwa wantu yá muna kutusadisa twatoma bakula o mfunu wa salu yandi, malongi mandi ye kimuntu kiandi.

O wantu balenda vova vo ‘Nsangu Zambote zasoneka Matai yovo Yoane.’ Ediadi ke diambi ko, kadi muna konso nkanda mwasonama “nsangu zambote mu kuma kia Yesu Kristu.” (Maku 1:1) Kansi e ludi i kiaki, kana una vo wantu yá basoneka e nsangu zambote mu kuma kia Yesu, nsangu zimosi kwandi kaka basoneka.

Wantu ayingi belongokanga e Diambu dia Nzambi betezanesanga e nsangu zina muna nkand’a Matai, Maku, Luka yo Yoane muna zaya kana vo ngwizani zina. Muna mvu wa 170 wa tandu kieto, nsoneki mosi wa musi Síria, una ye nkumbu a Tatian wavanga wo. Wabakula vo e nsangu zina muna nkanda miami za ludi ye Nzambi wasonekesa zo. Wayiza soneka nkanda mosi uyikilwanga vo Diatessaron, uyikanga o mambu mavangama muna zingu kia Yesu ye salu kiandi kia longa.

O nkanda, Yesu i Nzila, i Ludi yo Moyo, uyikanga ye sikididi Tkiawonso o lusansu lwa zingu kia Yesu ye salu kiandi. ulendele wo vanga kadi owau tutomene bakula e ndungan’a ungunza wa Yesu ye yingana yandi. O zayi wau utusadisi twabakula mambu mana Yesu kavova yo vanga, kadi masonamene muna ndandani mavangamena. E lekwa ina asatuludi besololanga ikudikilanga e ziku kia mambu mayingi ye ngindu za asoneki. Dia ludi vo, ke muntu ko olenda zaya ye sikididi kiawonso e ndandani za mambu mawonso mavangama muna zingu kia Yesu. Kansi, o nkanda, Yesu i Nzila, i Ludi yo Moyo, usasilanga o mambu muna mpila ina malenda bakulwilwa ye muna ndandani.

Vava oyantika tanga nkanda wau, entete sia e sungididi muna mambu mena vo mamfunu kwa ngeye ye kwa wantu ana otoma zolanga. Kuvilakani ko vo Yesu Kristu wavovesa Toma wa nlongoki andi vo: “Mono i nzila ye ludi yo moyo. Ke vena ona okwiza kwa Se ko avo ke mu mono ko.”—Yoane 14:6.

O nkanda, Yesu i Nzila, i Ludi yo Moyo, ukusadisa mu toma bakula aweyi o Yesu kenana se “nzila.” Kadi muna yandi kaka o wantu balenda finamena Yave wa Nzambi muna sambu. Vana ntandu, Yesu i nzila kwa yeto muna vutulwisa e ngwizani eto yo Nzambi. (Yoane 16:23; Roma 5:8) Zaya dio vo, muna Yesu kaka tulenda kadila ye ngwizani ambote yo Nzambi.

Yesu i “ludi.” Kadi wavova e ludi yo lemvokela kio muna zingu kiandi. Diakala nze vika sia vo e ludi muna Yesu kiayizila. Walunganisa ungunza wayingi, wakituka “‘elo’ muna yandi.” (2 Korinto 1:20; Yoane 1:14) O ungunza wau ukutusadisanga mu bakula e fulu kia Yesu muna ndungan’a kani dia Nzambi.—Lusengomono 19:10.

Yesu Kristu yandi i “moyo.” Kadi muna lukulu, i kavanina o moyo andi walunga yo menga mandi, watusadisa kimana twavua “moyo wina vo moyo kikilu,” “moyo a mvu ya mvu.” (1 Timoteo 6:12, 19; Efeso 1:7; 1 Yoane 1:7) Yesu yandi i “moyo” kwa mafunda ye mafunda ma wantu bafwa, kansi besinga fuluka ye vuvu kia zinga yakwele mvu muna Paradiso.—Yoane 5:28, 29.

Yeto awonso tufwete zaya e fulu kia Yesu muna ndungan’a kani dia Nzambi. Tuna ye vuvu vo okala ye kiese kia longoka mayingi mu kuma kia Yesu muna nkanda wau, Yesu i “nzila, i ludi yo moyo.”