Betani i vata dina kuna este ya Mongo a Olive, tezo kia kilometa tatu ye Yerusaleme. (Yoane 11:18) Yesu wele ko, okotele muna nzo ya nsanga zole, Mareta yo Maria. Yau awole yo mpangi au Lazaro, akundi a Yesu, batomene kuntambula.

Lau diampwena bena diau dia tambula Masia muna nzo au. Mareta ozolele toma tambula Yesu, dianu vo oyantikidi lamba. Ekolo Mareta kelambanga, nsang’andi Maria ovuende vana ndambu a malu ma Yesu, mu winikina kena. I bosi, Mareta ovovese Yesu vo: “E Mfumu, nga kumwene ko vo nleke ame unsisidi mono mosi kaka ye salu e? Umvovesa keza kunsadisa.”—Luka 10:40.

Vana fulu kia tumba Maria, Yesu ovene longi kwa Mareta wau kefuntukanga mu kuma kia madia: “E Mareta, e Mareta, mambu mayingi otelekele o moyo yo tokanena. Kansi, makete kaka yovo dimosi kaka dina o mfunu. O Maria osolele ndambu ambote, ina ke ikunkatulwa ko.” (Luka 10:41, 42) Yesu osongele vo ke dina kwandi mfunu ko mu fwasa ntangwa yayingi muna lamba madia mayingi. Madia makete mafwana kwandi.

E ngindu za Mareta zambote kwandi. Kadi Yesu kazolele toma tambula. Kansi wau katokanene madia, ovidisi e lau dia wá malongi ma Mwan’a Nzambi. Yesu ovovele vo Maria ndambu ambote kasolele, ikuntwasila nluta mia mvu ya mvu. Ekwe longi diamfunu kwa yeto awonso!

Lumbu kimosi, Yesu ovene diaka longi diamfunu. Nlongoki mosi unyuvuidi vo: “E Mfumu, utulong’o samba, nze una Yoane kalongela alongoki andi.” (Luka 11:1) Yesu kavanga wo muna Longi diandi vana Mongo, se mvu mosi ye ndambu uviokele kala. (Matai 6:9-13) Kansi o nlongoki ndioyo kakala vo ko. Dianu vo, Yesu ovutukidi mambu masina kavova. I bosi otele kingana muna songa o mfunu wa kwaminina muna sambu.

Ovovele vo: “Avo mosi muna yeno una yo nkundi, wele kwa yandi kuna dingidingi, umvovese vo, ‘E nkundi, unsompeka mbolo tatu, kadi o nkundi ame una mu nkangalu unduakidi, kina ye má ikumvana ko.’ Kansi, ndiona una muna nzo kavutula vo: ‘Yambula kuntokanesa. E kielo kizikamene kala, ku mfulu ngina yo wan’ame; kilendi telama ko ngiza kuvana má.’ Inuvovese vo, avo muna kuma kia kikundi kiandi ke telama ko kamvana má, muna siandama kwandi i ketelamena kamvana konso ina kavuidi o mfunu.”—Luka 11:5-8.

Yesu kavovele ko vo Yave kalendi vana mvutu za sambu yeto ko wauna o nkundi kavangidi o nkwandi. Kansi, osongele vo avo nkundi ndioyo ovene kwandi kina kazolele wau kansiandamene, ozevo Se dieto dianzodi kuna zulu ovana e mvutu za sambu ya selo yandi yakwikizi. Yesu ovovele diaka vo: “Nukwamanana lomba, ozevo nuvewa; nukwamanana vava, ozevo nusolola; nukwamanana dodela, ozevo nuziulwilwa. Kadi konso ona okwamanana lomba, ovewa, konso ona okwamanana vava, osolola; konso ona okwamanana dodela, oziulwilwa.”—Luka 11:9, 10.

I bosi, muna tunta e sungididi kia wantu muna diambu diadi, Yesu otezanese Yave yo se dia wana, ovovele vo: “Nkia se vovo nwina, avo mwan’andi unlombele mbizi a maza, oyandi kayambula mbizi a maza, kamvan’e nioka? Yovo unlombele diaki, kamvana nkutu? Dianu vo, oyeno nuna yo bi, avo nuzeye vana tukau twambote kwa wan’eno, o Tata kuna zulu, nkia nduta keluta vana mwand’avelela kwa awana bekunlombanga!” (Luka 11:11-13) Ekwe ziku kiampwena kisonganga vo Se dieto owanga e nsambu yeto yo vanina yo e mvutu!