Yesu osansukidi muna Nazarete, mbanza yakete, yakondwa e tunda. E mbanza yayi ina kuna node ya Yuda, kuna zunga kia miongo mia Ngalili, kuna weste a yanga dianene diyikilwanga vo, Mbu a Ngalili.

Nanga vava Yesu kalungisi mvu miole, Yosefe yo Maria bezidi yandi omu Nazarete tuka kuna Engipito. Yamu kolo kiaki, mwana mosi kaka bena yandi. Kuna kwalanda, bawutidi aleke a Yesu—Yakobo, Yosefe, Simone yo Yuda. Yosefe yo Maria bawutidi diaka wan’amakento, nsanga za Yesu. Yesu aleke sambanu se kena yau.

Yesu una mpe ye yitu yankaka. Tulongokele kala oma ma Elisabete yo mwan’andi Yoane. Kwandá bezingilanga, kuna Sude ya Yuda. Kansi, vena mpe ye yitu kiau ozingilanga lukufi ye Ngalili, Salome wa nsang’a Maria, ngudi a nleke a Yesu. O nkaz’a Salome i Zebedayo. O wan’au wole, Yakobo yo Yoane, yau i mpangi zantete za Yesu. Ka tuzeye ko kana vo ntangwa yayingi bakalanga kumosi yo Yesu vava basansukanga, kansi kuna kwalanda yau awole bakalanga e ntwadi yo Yesu yo kituka se ntumwa zandi.

Yosefe osalanga kwayingi mu dikila e nzo andi. Mvadi a nti kena. Wau vo Yosefe osansasanga Yesu nze mwan’andi kikilu, i kuma keyikilwanga vo “mwan’a mvadi a nti.” (Matai 13:55) Yosefe olongele mpe Yesu e salu kia vala nti, otomene kio longoka. Kiaki i kuma wantu bayikila Yesu vo: “Mvadi a nti.”—Maku 6:3.

E nzo a Yosefe nsambil’a Yave besianga va fulu kiantete muna zingu kiau. Muna lemvokela o Nsiku a Nzambi, Yosefe yo Maria belonganga mambu ma Nzambi kwa wan’au ‘vava befonganga muna nzo, vava bekiyanga, leka yovo sikama.’ (Nsiku 6:6-9) Vena ye sambilu muna Nazarete. Tuna ye ziku vo Yosefe y’esi nzo andi i mûna bekwenda sambidilanga Yave. Kadi diavovua vo, “wau vo i fu kiandi, muna lumbu kia Vundu,” Yesu wele muna sambilu. (Luka 4:16) Yau awonso muna nzo betoma yangalelanga o nkangalu bevanganga mu kwenda sambila Yave muna tempelo kuna Yerusaleme.