Vava mbasi Ngambiele kazayisi Maria vo mwan’a yakala kewuta, ona ovewa nkumbu a Yesu yo yala se Ntinu yakwele mvu, Maria oyuvuidi vo: “Aweyi divangamena ediadi, wau vo kizeye yakala ko?”—Luka 1:34.

Mbasi Ngambiele ovutwidi vo: “O mwand’avelela ukwiza omo ngeye, o nkum’a Mpungu ukuyitalela. Dianu vo, ndiona owutwa oyikilwa vo wavelela, Mwan’a Nzambi.”—Luka 1:35.

Nanga muna sadisa Maria katambulwila e nsangu zazi, mbasi Ngambiele umvovese diaka vo: “Elisabete wa yitu kiaku, oyu wayikilwa vo sita, oyandi mpe lukau lwa mwan’a yakala kabakidi muna kinunu kiandi, eyayi i ngonde andi ya sambanu; kadi kuna kwa Nzambi ke vena diambu ko dilenda funga.”—Luka 1:36, 37.

Maria otambulwidi mana kavoveso kwa mbasi Ngambiele nze una tulenda mona mu mvutu zandi: ‘Tala ntaudi a Yave! Yambula diambu diaku diavangama omu mono.’—Luka 1:38.

Vava mbasi Ngambiele kakatukìdi, Maria okubamene mu kwenda kingula Elisabete yo Zakaria wa nkaz’andi, ana bezingilanga kuna londe lwa Yuda, lukufi ye Yerusaleme. Tuka muna Nazarete yakuna Yuda, nanga Maria kafwete kangala lumbu tatu yovo lumbu yá.

Maria olweke kuna nzo a Zakariya. Okotele, okayisi Elisabete wa yitu kiandi. Vana vau, Elisabete ozele yo mwand’avelela, ovovese Maria vo: “Osambwilu vana vena akento awonsono, isambwilu mpe e mbongo a vumu kiaku! Akweyi dintukìdi e lau diadi, vo ngudi a Mfumu ame wizidi oku ngina? Kadi e zú dia nding’aku vava dizidi omu matu mame, o mwana omu vumu kiame onikukini kuna kiese.”—Luka 1:42-44.

Maria ovutwidi matondo, oku vo: “O moyo ame utundidikidi Yave, o ntim’ame uyangalele muna Nzambi wa Mvuluzi ame, kadi watadidi lusakalalu lwa ntaudi andi a nkento. Tuk’omu wau, mbandu zawonso zikungikila vo nkwa nsambu, kadi o Nengolo oma kampangidi manene.” Kanele vo Maria osongelo e dienga, tumwene vo, ovene o nkembo wawonso kwa Nzambi. Ovovele vo: “E nkumbu andi yavauka, kadi muna mbandu ye mbandu, osonganga e nkenda zandi kw’awana bekumvuminanga.”—Luka 1:46-50.

Muna mvovo mia ungunza wavumunwinwa, Maria okwamanene vana nkembo kwa Nzambi, oku vo: “Ovangidi owu wankuma muna koko kwandi; omwanganese akwa lulendo muna makani ma ntima miau. Okunkwidi ayadi muna kunda yau, otundidikidi ana basakalele; ozadisi akwa nzala ye lekwa yambote, e mvuama osindikidi zo moko-moko. Osadisi Isaele wa ntaudi andi muna kunsungamesa e nkenda zandi, una kavovesa mase meto, kuna kwa Abarayama ye mbongo andi, yakwele mvu.”—Luka 1:51-55.

Maria tezo kia ngonde tatu kavangidi muna nzo a Elisabete, nanga okunsadisanga muna tumingu twansuka vitila kawuta. Kieleka, Elisabete yo Maria akento akwikizi, bayimiti muna lusadisu lwa Nzambi. Diakiese kikilu wau bena vamosi mu kolo kiaki.

Yindula o zitu kaveno Yesu vitila kawutuka. Elisabete oyikidi Yesu vo: “mfumu ame,” i bosi, o mwana wina muna vumu kiandi ‘onikukini kuna kiese’ vava Maria kankingwidi mu nkumbu antete. Kansi ke wau ko o wantu ankaka bekadila yo Maria yo mwan’andi kevingilanga.