TALA e nti miami mia nda, mvuma zambote ye miongo miampwena. Nga ke fulu kiambote ko? Tala nkai odianga vana koko kwa kimwana-mwana. Tala e nkosi ye mvalu. Nga ozolele zingila va fulu nze kiaki?

Nzambi ozolele vo wazinga yakwele mvu muna paradiso ova ntoto. Kazolele ko vo wamonange mpasi nze zina bemonanga wantu o unu. Tala nsilu kevananga Nkand’a Nzambi kw’awana bezingila muna paradiso yampa: “Nzambi yandi kibeni okala yau, o lufwa, ke lukala diaka ko; musungula kala diaka dilu, yovo kazu, ngatu mpasi: oma mantete maviokele.”

O Yesu osikidisa vo mambu mama mavangama. Nga ozeye e ntangwa mevangama mambu mama? Elo, vava kimanisa e mbi yawonso yo umpumbulu ova ntoto. Sungamena vo vava Yesu kakala ova ntoto wawuka mpila zawonso za mayela yo fula nkutu mafwa. Yesu wavanga wo mu songa mana kevanga ova ntoto vava keyala se Ntinu a kintinu kia Nzambi.

Se badiki nkia mawete mekala mu zingila muna paradiso yampa ova ntoto! O Yesu y’awana kasola beyala kun’ezulu. Ayadi awaya belunga-lunga awonso ova ntoto bakala ye kiese. Yambula twazaya mana tufwete vanga kimana Nzambi katuvana moyo a mvu ya mvu muna paradiso yampa ova ntoto.