Yave wavovesa Mose vo: ‘Tomboka oku ngina ova mongo. Ikuvana e nsiku mina isoneka vana babu.’ Mose watomboka kuna mongo yo kala ko mini 40 ye fuku 40. Ekolo kakala kuna mongo, Yave wasoneka Nsiku Kumi muna babu yole ya matadi yo vana yo kwa Mose.

Una vavioka fikolo, Aneyisaele bayindula vo Mose ke vutuka diaka ko. Bavovesa Arone vo: ‘Muntu tuzolele kimana kakala mfidi eto. Utuvangila nzambi.’ Arone wabavovesa vo: ‘Nuntwasila e lunga yeno yawolo.’ Wazelomona wolo wauna yo vanga teke kia mwan’a ngombe. O nkangu wavova vo: ‘O mwan’a ngombe ndioyu i Nzambi eto ona watuvaikisa muna Engipito.’ Bayantika sambila mwan’a ngombe a wolo yo vanga nkinzi wampwena. Nga diambote bavanga? Ve, kadi Aneyisaele nsilu basia vo Yave kaka besambila. Kansi ke balungisa nsilu basia ko.

 Yave wamona dina bavanga. Wavovesa Mose vo: ‘Wenda kwa nkangu. Bakulwidi nsiku miame, bayantikidi sambila nzambi aluvunu.’ Mose wakulumuka ye babu yole vana moko.

Vava kafinama vana vakala o nkangu, Mose wawá e nkunga bayimbilanga. Wabamona ekolo bakinanga yo fukamena mwan’a ngombe. Mose wafunga kikilu makasi. Watuba babu yole vana ntoto, yau yole yawudika. Vana vau, wakosomona teke kiakina. I bosi, wayuvula Arone vo: ‘Ekuma oyambulwidi vo nkangu wafila mu vanga diambu diadi diambi?’ Arone wavutula vo: ‘Kufungi makasi ko. Otomene zaya nkangu wau. Lomba balombele vo yabavangila nzambi. Muna kuma kiaki, nsidi wolo wau vana tiya yo vanga mwan’a ngombe ndioyu.’ Arone kafwana vanga diambu diadi ko. Mose wavutuka kuna mongo yo dodokela Yave kimana kaloloka o nkangu.

Yave waloloka ana bakala yo luzolo lwa kunlemvokela. Nga obakwidi ekuma diakadila diamfunu kwa Aneyisaele mu lemvokela Mose?