Se tezo kia 40 ma mvu Aneyisaele bena muna makanga. Bakutumuna mbanza zayingi zakala ye makesa mangolo. Owau, ekolo bakala muna ndimb’a Moabe kuna este ya Nkoko a Yodani, e ntangwa yafwana ya kota muna Nsi a Nsilu. O Balaki wa ntinu a Moabe wamona wonga kadi e nsi au se ikutumunwa kwa Aneyisaele. Muna kuma kiaki, wabokelesa muntu mosi wayikilwanga vo Bilami keza ku Moabe kimana kasiba Aneyisaele.

Kansi, Yave wavovesa Bilami vo: ‘Kusibi Aneyisaele ko.’ Muna kuma kiaki, Bilami kayenda ko. O ntinu Balaki wambokelesa mu nkumbu wanzole yo kunsia nsilu vo okumvana yawonso kazolele. Kana una vo i wau, Bilami kazola kwenda ko. I bosi, Nzambi wamvovesa vo: ‘Telama wenda, kansi ofwete vova kaka konso dina ikuvovesa.’

Bilami wamanta vana ntandu a buluku diandi yo kwenda kuna Moabe. Wayenda ye kani dia siba Aneyisaele, kana una vo Yave wamvovesa vo kavangi wo ko. Mbasi a Yave yamoneka muna nzila nkumbu ntatu. Bilami kamonanga mbasi ko, buluku diandi kaka diamonanga e mbasi yayina. Entete, e buluku diakatuka muna nzila yo tina kuna mfuta. Muna nkumbu wazole, e buluku diayekama muna yaka kia tadi yo niemenena kulu kwa Bilami. Muna nkumbu watatu, e buluku dialeka muna nzila. Muna nkumbu ntatu miami, Bilami wawandanga e bukulu yo nkau andi.

Muna nkumbu watatu, Yave waziula o nua a buluku kimana diavova. E buluku diayuvula Bilami vo: ‘Ekuma okungwandilanga kaka?’ Bilami wavova vo: ‘Mono kwaku osakanenanga. Kele vo yakala yo nsosolo va koko nga ivondele.’ E buluku diavova vo: ‘Se mvu miayingi ikunatanga. Nga yavanga wo kala?’

I bosi, Yave watemona meso ma Bilami, wamona e mbasi. Mbasi wavova vo: ‘Yave wakanikina vo kusibi Aneyisaele ko.’  Bilami wavova vo: ‘Nsumukini. Yambula yavutuka kuna nzo.’ O mbasi wamvovesa vo: ‘Olenda kwaku kwenda kuna Moabe, kansi ofwete vova kaka dina ikuvovesa.’

Nga Bilami walongoka diambu muna mawonso mama? Ve. Bilami wavava siba Aneyisaele nkumbu ntatu. Kansi konso ntangwa kavanganga wo, Yave wakitulanga sibu kiaki se nsambu. Kuna kwalanda, Aneyisaele banuanisa Moabe, o Bilami wavondwa. Nga ke diambote ko kele vo Bilami kawila Yave muna nkumbu wantete?