Yosefe mosi muna wan’a Yakobo. E mpangi zandi bazaya wo vo Yosefe yandi watoma zolwanga kwa se diau. Aweyi mpangi za Yosefe bamonanga mu kuma kia diambu diadi? Bamuenanga Yosefe kimpala, ke banzolanga ko. Vava Yosefe kalota e ndozi, wazayisa yo kwa mpangi zandi, bayindula vo kuna kulanda bevumbamena Yosefe yo kituka se mfumu au. Muna kuma kiaki, makasi bakala mau muna yandi mawokela.

Lumbu kimosi, mpangi za Yosefe bayenda vungula mameme lukufi ye mbanza Sekeme. Yakobo watuma Yosefe kenda kubatala kana vo bena kiambote. Vava bamona Yosefe kuna vala, bayantika vova vo: ‘Nutala nloti a ndozi olweke. Nwiza, twamvonda.’ Bankanga yo kuntuba muna wulu. Kansi, Yuda ona wakala mosi muna mpangi zandi wavova vo: ‘Ke tumvondi ko. Yambula twanteka kakituka se mbundu.’ Muna kuma kiaki, bateka Yosefe mu palata 20 kwa minkiti mia Anemidiani ana bayendanga kuna Engipito.

I bosi, e mpangi za Yosefe babaka kinkutu kiandi yo kusa kio menga ma nkombo. Banata kio kwa se diau yo vova vo: ‘Tala e kinkutu kiaki, nga ke kia mwan’aku ko?’ Muna kuma kiaki, Yakobo wabanza vo bulu kiambi kiavonda Yosefe. Mpasi kikilu kamona muna ntima. Ke vakala muntu ko walenda kumfiaulwisa.

Vava kalwaka kuna Engipito, Yosefe watekwa kwa Potifa ona wakala vo mfumu watoma zayakana. Kansi, Yave wasadisanga Yosefe. Potifa wamona vo Yosefe watoma salanga kikilu e salu kiandi ye wafwana bundwa e vuvu. Ke vavioka kolo kiayingi ko, Yosefe wavewa kiyekwa kia lunga-lunga mavua mawonso ma Potifa.

 O nkaz’a Potifa wamona vo Yosefe mote kikilu ye nkwa nkuma. Lumbu yawonso wavovesanga Yosefe vo kaleka yandi. Adieyi kavanganga o Yosefe? Katambulwilanga ko yo vova vo: ‘Kilendi wo vanga ko. Ediadi diambi kikilu. O mfumu ame okumbundanga e vuvu, ongeye u nkaz’andi. Avo ndele yaku, Nzambi isumukina.’

Lumbu kimosi, o nkaz’a Potifa wazola komekena Yosefe kimana kaleka yandi. Wasimba Yosefe muna kinkutu, kansi Yosefe watina. Vava Potifa kalwaka ku nzo, nkaz’andi wamvovesa vo Yosefe wazola kunleka mu kingolo. Kavova ludi ko. Potifa wafunga kikilu makasi yo sia Yosefe muna pelezo. Kansi, Yave kavilakana Yosefe ko.