E nganga zambuta banata Yesu kuna lumbu lwa nguvulu. Pilato wabayuvula vo: ‘Nkia diambu diambi kavangidi o muntu ndioyo?’ Bavutula vo: ‘Edi kevovanga vo yandi i ntinu.’ Pilato wayuvula Yesu vo: ‘Ngeye i Ntinu a Yuda?’ Yesu wavutula vo: “E Kintinu kiame ke kia nza yayi ko.”

I bosi, Pilato watwika Yesu kwa Erodi wa mfumu a Ngalili mu zaya kana vo olenda solola diambu muna yandi. Wau vo Erodi kasolola diambu diambi ko muna Yesu, wamvutula diaka kwa Pilato. Muna kuma kiaki, Pilato wavovesa nkangu vo: ‘Mono yo Erodi ke tumwene diambu diambi ko muna muntu ndioyo. Nzolele kumvevola.’ Kansi o nkangu wakaza vo: ‘Umvonda! Umvonda!’ Masoladi bayantika wanda Yesu muna lubamba, kuntawulwila mete yo kunwanda e nkome. Bansia e mpu a nsende vana ntu, bayantika kunseva yo vova vo: “Kiambote kiaku, e Ntinu a Ayuda!” I bosi, Pilato wavovesa diaka nkangu vo: ‘Kimwene diambu diambi ko muna muntu ndioyo.’ Kansi o nkangu wakaza vo: “Kamanikwa vana nti!” Muna kuma kiaki, Pilato wayekola Yesu vana moko mau kimana bamvonda.

Banata Yesu vana fulu kiayikilwanga vo Ngolongota, bankoma vana nti yo telamesa wo. Yesu wasamba vo: ‘E Tata, ubaloloka, kadi ke bazeye ko dina bevanganga.’ O nkangu wayantika seva Yesu yo vova vo: ‘Avo ngeye u Mwan’a Nzambi, kulumuka vana nti bakomene. Uyivuluza.’

Mosi muna yimpumbulu ana bakomwa vana ndambu andi wavova vo: “Unsungamena vava okota muna Kintinu kiaku.” Yesu wansia nsilu vo: “Okala yame muna Paradiso.” Muna masika, e nsi yawonso yabukama ye tombe mu tezo kia ola tatu. Akaka muna alongoki batelama vana ndambu a nti. Mosi muna yau i Maria wa ngudi a Yesu. Yesu wavovesa Yoane vo katoma lunga-lunga Maria nze ngudi andi.

I bosi, Yesu wavova vo: “Dilunganene!” Vava kavova e mvovo miami, ovetekele ntu, ofwidi. Vana vau, o ntoto wazakama mu ngolo. Muna tempelo, o nlele wavambulanga e Fulu Kiavauka ye  Fulu Kisundidi o Vauka watiazuka vana kati. O mfumu a makesa wavova vo: ‘Kieleka, ndioyo i Mwan’a Nzambi kikilu.’