Yoane walonganga vo: ‘Ndiona unsundidi mu kwiza kena.’ Vava Yesu kakala ye tezo kia mvu 30, watuka kuna Ngalili yo kwenda kuna Nkoko a Yodani, kuna Yoane kavubilanga o wantu. Yesu wazola vo Yoane kamvuba. Kansi Yoane wavova vo: ‘Mono kilendi kuvuba ko. Ngeye ofwete kumvuba.’ Yesu wavovesa Yoane vo: ‘Yave ozolele vo ongeye wamvuba.’ Muna kuma kiaki, bayenda muna Nkoko a Yodani. I bosi, Yoane wadimuna emvimba Yesu muna maza.

Vava Yesu kavaika muna maza, wasamba. Vana vau, e zulu diaziuka, o mwand’a Nzambi wakulumuka muna yandi nze yembe. I bosi, Yave wavova tuka kuna zulu oku vo: “Ongeye u Mwan’ame anzolwa, ngeye iyangalelanga.”

Vava mwand’a Yave wakulumuka kwa Yesu, wakituka se Kristu yovo Masia. Tuka wauna, wayantika e salu kina Yave kantumina ova ntoto.

Vava kavubwa, vana vau Yesu wayenda muna makanga yo kala kûna lumbu 40. Vava kavutuka, wayenda kingula Yoane. Ekolo Yesu kafinamanga, Yoane wavova vo: ‘Ndioyo i Mwan’a meme a Nzambi ona okatula e sumu dia nza.’ Muna mvovo miami, Yoane wasadisa wantu mu zaya vo Yesu i Masia. Nga ozeye dina diabwila Yesu ekolo kakala muna makanga? Yambula twazaya.