Nkand’a Nzambi buka yole ya Akristu uyikanga ana belunga-lunganga nkutakani, ‘akengi ye selo ya salu.’ (Filipi 1:⁠1) Mpangi zayingi besalanga se akengi ye selo ya salu muna konso nkutakani. E selo ya salu, nkia salu besalanga muna wete dieto?

Bevananga moko kwa buka kia akuluntu. Selo ya salu, i mpangi bena ye ngwizani ambote yo Yave, akaka muna yau aleke, akaka ambuta, ampangi awaya vuvu bebundwanga. Besalanga salu yayingi ya mfunu ya moko muna nkutakani. Ediadi disadisanga akuluntu mu sia e sungididi kiau muna salu kia longa yo vungula ekambi.

Salu yamfunu besalanga. Akaka muna selo ya salu asongi a fulu kia fonga, betambulanga awonso bekwizanga muna tukutakanu. Akaka besadilanga kuna nzila masini, kayanesa e nkanda ye zunga ya sila umbangi kwa mpangi muna nkutakani yo fimpa tukau twa nkutakani. Beyikamanga mpe salu kia lunga-lunga yo vangulula Seka dia Kintinu. Akuluntu balenda kubalomba basadisa mpangi z’anunu. Konso salu bevewanga selo ya salu besalanga kio yo ntim’amvevo, muna kuma kiaki betoma zitiswanga.​—1 Timoteo 3:13.

Besonganga mbandu ambote nze akala Akristu. Selo ya salu besolwanga mu kuma kia fu yambote ya Kikristu besonganga. Vava befilanga malongi muna tukutakanu, lukwikilu lweto bekumikanga. Muna vitang’o ntu muna salu kia umbangi, selo ya salu bekutusadisanga mu wokesa o vema kweto muna salu kiaki. Wau vo besalanga kumosi ye buka kia akuluntu, selo ya salu kiese ye kintwadi bewokesanga muna nkutakani. (Efeso 4:​16) Kuna ntwala, oyau mpe balenda kuyifwanisa mu sala se akuluntu.

• E selo ya salu nkia mpila wantu bena?

• Aweyi selo ya salu besadisilanga e nkutakani kimana yasala mu mpila yambote?