Nze una usonganga e nkumbu Seka dia Kintinu, mawonso melongwanga muna fulu yayi mu Nkand’a Nzambi metukanga ye Kintinu kia Nzambi mevovelanga. Kintinu i ntu a diambu wa nsangu zambote kasamunanga o Yesu.​—Luka 8:1.

I fulu kia nsambila aludi muna konso zunga. Eseka dia Kintinu, i fulu kikubikilwanga e salu kia samuna nsangu zambote za Kintinu muna zunga. (Matai 24:​14) Maseka ma Kintinu maswaswana mekalanga, kansi mawonso matoma tungwa yo viengeswa. Maseka mayingi mesadilwanga kwa nkutakani zayingi. Mu mvu miavioka, mafunda ye mafunda ma Maseka ma Kintinu mampa matungwa mu kuma kia lutangu lwa nkutakani ziwokelanga. Aweyi tulendelanga mo tungila?​—Matai 19:26.

Metungwanga muna lusadisu lwa nzimbu zitukanga kuna vula. E nzimbu zawonso zitambulwanga zifilwanga kuna vula muna sadisa konso nkutakani ivava tunga yovo vangulula Seka dia Kintinu.

Metungwanga kwa mpangi bekuyivananga kuna mvevo lembi futwa nzimbu. Muna nsi zayingi, vena ye Buka ya Mpangi Betunganga Maseka ma Kintinu. Ampangi awaya ye awana bekubayikamanga bekwendanga mu fulu yayingi ya zunga kiau muna tunga Maseka ma Kintinu. Muna nsi zakaka, Mbangi za Yave ana batomene zaya e salu kia tunga bevewanga kiyekwa kia fila e salu kia tunga yo vangulula Maseka ma Kintinu ma zunga kimosi. Konso zunga kina ye mpangi batomene zaya e salu kia tunga, ampangi awaya besadiswanga kwa mpangi za nkutakani ana bekuyivananga kuna mvevo muna vanga e salu kiaki. O mwand’a Yave ye ngolo za nkangu andi zisadisanga mu sala e salu kia tunga Maseka ma Kintinu.​—Nkunga 127:1; Kolosai 3:23.

• Ekuma e fulu yeto ya nsambila iyikilwanga vo Seka dia Kintinu?

• Aweyi tulendelanga tunga Maseka ma Kintinu mu nza yawonso?