Kana nkutu kuna nsi a mvula ye nteke, ke tukondwanga ko muna tukutakanu tweto twa Kikristu. Ekuma Mbangi za Yave besilanga e ngolo za lungananga kumosi ye mpangi zau za mwanda kana nkutu vava bekalanga bayoya mu kuma kia salu ye mpasi za zingu?

Dikutusadisanga mu kala e nkal’ambote. Paulu wa ntumwa wavova mu kuma kia awana tulungananga yau muna tukutakanu vo, “twabadikaziana.” (Ayibere 10:24) E mvovo badikaziana usongele vo, “toma bakula” yovo toma zaya muntu yo nkw’andi. Ozevo, e mvovo mia Paulu wa ntumwa mikutukasakesanga mu tokanena ewete dia akaka. Vava tuzayanga e zingu kia mpangi zeto z’Akristu, tubakulanga vo akaka muna yau basunda mambu mampasi nze mana tunwananga mau, ozevo balenda kutusadisa mu sunda mo.

Kikundi kieto disiamisanga. Muna tukutakanu tweto ke tulungananga ye mpasi wantu tuzayanene ko, kansi ye akundi eto akieleka. Ezak’e ntangwa, tukalanga yau entwadi yo dila vamosi. E kikundi kiaki, nkia nluta kikututwasilanga? Kikutusadisanga mu vwa muntu yo nkw’andi o mfunu yo siamisa o zola kweto. Wau vo kikundi kieto kitoma sikilanga, vava mpangi zeto bekalanga mu mpasi, tukubasadisanga vana vau. (Ngana 17:17) Muna kalanga kumosi ye mpangi zawonso za nkutakani eto, tusonganga vo tutokanenanga ewete dia muntu yo nkw’andi.—1 Korinto 12:25, 26.

Tukasakese wavanga kikundi y’awana bevanganga luzolo lwa Nzambi. Olenda solola akundi awaya vana vena Mbangi za Yave. Kuyambula ko vo konso diambu diasimba mu lembi lungana yeto.

• O lungana kumosi ye mpangi zeto ekuma dikututwasilanga e nluta?

• Nkia ntangwa okwiza lungana yeto muna tukutakanu yo zayana ye mpangi zeto?