Avo Nkand’a Nzambi olongokanga ye Mbangi za Yave, nanga oteka kubikanga konso longi nulongoka. Diau dimosi mpe, muna baka e nluta vava tukwendanga muna tukutakanu tweto, diambote twateka kubikanga mambu tulongoka. Vava tukalanga ye fu kia kubika malongi ma tukutakanu, tubakanga e nluta.

Sola e fulu ye ntangwa yambote olenda longoka. Nkia ntangwa okalanga ye ngindu zavuvama? Mu mene una kwayantikidi ko e salu yovo mu fuku vava wana belekanga? Kana nkutu vo kuna ye ntangwa yayingi ko mu longoka, sikidisa e ntangwa olenda longoka, kuyambula ko vo konso diambu diavunzanesa ekani diaku. Sola e fulu kiavuvama, kanga e radio, televizau ye telefone aku. O samba una kwayantikidi longoka ko, dilenda kusadisa mu vuvika e ngindu yo sia e sungididi kiaku muna Diambu dia Nzambi.—Filipi 4:6, 7.

Toma kubama yo sia sinsu vana fulu ovanina e mvutu. Entete, vava bakula mambu olongoka. Badikanga e ntu a diambu w’elongi yovo kapu, yindula una konso ntu a diambu wakete unina e ngwizani ye ntu a diambu w’elongi, fimpa e fwaniswa ye yuvu ya lufimpu yisonganga e mambu mamfunu mena mun’elongi. I bosi, tanga konso tini yo vava e mvutu za kiuvu. Tanga e sono yiyikilu, yindula una yinina e ngwizani y’elongi. (Mavangu 17:11) Avo osolwele e mvutu za kiuvu, sia e sinsu vana vena e mvovo miasina muna sungamena e mvutu. I bosi, avo dilendakana olenda kwaku zangula e koko muna lukutakanu yo vana e mvutu zankufi muna mvovo mia ngeye kibeni.

Muna fimpa konso diambu nubadika muna tukutakanu twa konso lumingu, olenda kudikila mambu mampa muna zayi waku wa Nkand’a Nzambi.​—Matai 13:​51, 52.

• Nkia diambu olenda sikidisa muna kubikanga malongi ma lukutakanu?

• Aweyi olenda kubamena muna vana e mvutu muna tukutakanu?