Tala fimwana-mwana mu fwaniswa. Nanga kinsona ye wonga kemonanga, ke wau ko? Ngeye mpe wamona wo kala?— Ezak’e ntangwa, yeto awonso tumonanga wonga. Nkand’a Nzambi uyikanga akundi a Yave ana bamona mpe kinsona yo wonga. Mosi muna yau i Eleya. Yambula twalongoka mu kuma kiandi.

Eleya kuna Isaele kazingilanga, mvu miayingi vitila Yesu kawutuka. Akabi wa ntinu a Isaele, kasambilanga Yave ko wa Nzambi aludi. Akabi yo Izebele wa nkaz’andi, Bale wa nzambi aluvunu basambilanga. Muna kuma kiaki, ndonga muna nkangu a Isaele bayantika mpe sambila Bale. Izebele wa ntinu ankento muntu ambi kikilu kakala. Wazola vonda awonso basambilanga Yave, kumosi yo Eleya. Nga ozeye dina Eleya kavanga?—

 Eleya watina. Wayenda muna makanga yo swekamena muna nduka. Nga ozeye ekuma katinina?— Elo, wonga kakala wau. Kansi, Eleya kakala ye kuma ko kia mona wonga. Ekuma? Kadi wazaya wo vo Yave okunsadisa. Yave wateka songa kala nkum’andi kwa Eleya. Lumbu kimosi, Yave wavana mvutu za sambu kia Eleya vava katwika tiya tuka kuna zulu. Owau, Yave wadi sadisa mpe Eleya.

Ekolo Eleya kakala muna nduka, Yave wavovana yandi yo kunyuvula vo: ‘Nki osalanga o kwaku?’ Eleya wavutula vo: ‘Mono kaka nsidi mun’awana bekusambilanga. Mono mosi kaka ngina, wonga ngina wau vonda bazolele kumvonda.’ Eleya wabanza vo asambidi awonso a Yave bavondwa. Kansi, Yave wavovesa Eleya vo: ‘Ve, ediadi ke dialudi ko. Vena ye 7.000 ma wantu bakinu kunsambila. Kala ye unkabu. Salu kiayingi ngina kiau ikuvana wasala.’ Nga obenze vo Eleya wayangalala vava kawá e mvovo miami?—

Adieyi olenda longoka mu mana mabwila Eleya?— Kufwete monanga kinsona ko ngatu wonga. Una ye akundi ana bezolanga Yave ye bekuzolanga mpe. Vana ntandu, Yave una yo nkuma wayingi, kekuyambula ko. Nga kuna ye kiese ko kia zaya vo kuna ngeye mosi ko?—