Longi dia 11

Tukwikilu ye Fu Yikendelekanga Nzambi

Nkia tukwikilu ye fu ina yambi? (1)

Akristu nga bafwete kwikila vo o Nzambi i Nzambi mu Ntatu? (2)

Ekuma akristu akieleka kebekembelelanga lumbu kia luwutuku ko, ye Nduta ya tandu kiaki, ngatu vo luyindulu lwa lumbu kia lungisa e mvu? (3, 4)

Amafwa nga balenda vang’e mbi kw’awana ben’o moyo? (5) O Yesu nga v’ekuluzu kakomwa? (6) Nkia mfunu dina dia yangidika Nzambi? (7)

1. Ke tukwikilu ye fu yawonso ko ina yambi. Kansi o Nzambi keyangalelanga yo ko kele vo mu nsambil’a luvunu yatuka yovo ke ina ngwizani ko yo maka malongi ma Nkand’a Nzambi.—Matai 15:6.

2. Nzambi mu Ntatu: Nga Yave i Nzambi mu Ntatu—wantu atatu mu Nzambi mosi kaka? Ve! O Yave, w’Ese, “i Nzambi mosi kaka aludi, NM.” (Yoane 17:3; Maku 12:29) O Yesu i Mwan’Andi antete ye osakalelanga Nzambi. (1 Korinto 11:3) O Se osundidi o Mwana. (Yoane 14:28) O mwand’avelela ke muntu ko; i ngolo za Nzambi ezi zikumikanga.—Etuku 1:2; Mavangu 2:18.

3. Lumbu kia Luwutuku ye Nduta: O Yesu kawutuka mu lumbu kia 25 kia ngonde a kumi ye zole ko. Mu mfinama tezo kia lumbu kia 1.° kia ngonde kumi kawutuka, muna nsungi a mvu ina vo avungudi mu nzanza bakalanga yo yingilang’ekambi diau o fuku. (Luka 2:8-12) O Yesu kasidi kanikina ko vo akristu bakembelelanga e lumbu kia luwutuku lwandi. Kansi, watuma vo bakembelelanga yovo yindulanga o lufwa lwandi. (Luka 22:19, 20) Okembelela e lumbu kia luwutuku yo mana mevangwanga muna lumbu kiakina mu nsambil’ankulu ya luvunu matuka. Diau adimosi mpe ye fu eki kiyikilwanga vo nduta, ina besadilanga o maki ye nlumba. Akristu antete kebakembelelanga Lumbu kia luwutuku ko, ngatu vo Nduta ya tandu kiaki, omu tandu kiaki mpe akristu aludi kebevanganga wo ko.

 4. Luyindulu lwa lungisa e mvu: O tuyindulu twa lungisa e mvu tuyikwang’omu Nkand’a Nzambi twa wantu ke basambilanga Yave ko. (Etuku 40:20-22; Maku 6:21, 22, 24-27) Akristu antete ke bakembelanga luyindulu lwa lungisa e mvu ko. E fu kia kembela o lungisa e mvu mu nsambila zankulu zaluvunu kiatuka. Akristu akieleka bevananga o tukau yo sakana kumosi y’akaka muna lumbu yakaka ya mvu.

5. Wonga wa mafwa: Amafwa ke balendi vanga ngatu zaya konso diambu ko. Ke tulendi kubasadisa ko, ngatu vo yau batuvang’e mbi. (Nkunga 146:4; Kimpovi 9:5, 10) O moyo fwa ufwanga; ke uzinganga ko kele vo muntu ofwidi. (Yezekele 18:4) Kansi, ezak’e ntangwa e mbasi zambi ziyikwanga vo nkwiya, bekuyivuninanga vo mianda mia mafwa. E fu kia mona wonga yovo sambila e mafwa kiayiva.—Yesaya 8:19.

6. Ekuluzu: O Yesu kafwila v’ekuluzu ko. Vana nti kafwila. O mvovo wa kingerekia wasekolwa vo “ekuluzu”, muna nsekola zayingi za Nkand’a Nzambi, nti kaka ziyikanga. E sinsu ki’ekuluzu mu nsambila yankulu ya luvunu kiatuka. Akristu antete kebasadilanga ngatu sambila ekuluzu ko. Ozevo, nga diambote kwa ngeye mu sadila ekuluzu muna sambila?—Nsiku 7:26; 1 Korinto 10:14.

7. Dilenda kala diampasi kikilu muna yambula e fu ye mavangu mama. Ayitu ye akundi nanga balenda kukomena vo kusobi ko o lukwikilu. Kansi kadi, oyangidika Nzambi kusundidi o mfunu ke mu yangidika wantu ko.—Ngana 29:25; Matai 10:36, 37.

[Foto muna lukaya 22]

O Nzambi ke Nzambi mu Ntatu ko

[Foto muna lukaya 23]

Lumbu kia luwutuku ye Nduta ya tandu kiaki mu nsambil’ankulu ya luvunu yatuka

[Foto muna lukaya 23]

Ke vena konso kuma ko kifwete sambilwa amafwa ngatu kubamwena wonga