Mu mvu 30 miviokele, wantu ayingi bekwikilanga vo e ngwizani vana vena nsi zawonso omu nza yambote kibeni ye yakumama nkutu. Kansi, muna kuma kia mambu mabwidi ke kolo ko, e ngindu za wantu ayingi muna diambu diadi zisobele.

•   Ekolo wantu betokananga vo e vita ya Faixa de Gaza ilenda sayana muna nsi za Ásia, makesa ma Isaele ye Hezbollah mayantikidi nuana kuna nkendelo a Líbano.—Zulunalu ya Reuters, kina kia 6 kia Yanuali, 2024.

•   “Ekolo e nsi ziyikamanga Irã ziyantikidi nuanisa mbeni zandi, e nsi ya Irã yayantikidi vangulula makompani ma vangila nkele miangolo milenda fwasa e nza yawonso. E nsi a Rússia ye China kuna sambu diandi mpe bena. Muna kuma kiaki, e nsi ya Irã ikitukidi diaka se vonza kiampwena kuna kwa nsi zawonso za Mputu.”—Zulunalu The New York Times, kina kia 7 kia Yanuali, 2024.

•   “E bomba za Rússia zakinu fwasakesa mbanza zawonso za Ucrânia.”—Nsangu za Nacoes Unidas, kina kia 11 kia Yanuali, 2024.

•   “E kimvuama kia China ye vu kiandi kia makesa kitomene vuatumuka. Etima dia esi Taiwan dia baka e kimpwanza mu wokela kaka dina. E ngwizani vana vena China ye Estado Unidos ke yambote ko. Mawonso mama mesonganga vo vonza kiampwena kifinamene.”—Zulunalu ya The Japan Times, kina kia 9 kia Yanuali, 2024.

 Nga e Bibila diambu kivovanga mu kuma kia vita tumonanga mu nz’amvimba o unu? Nga e vita zazi zilenda twasa e vita ya nz’amvimba?

 E Bibila ke kivovelanga vita ya sikididi ko nze ezi zinuanuanga o unu. Kansi, kiasakula vo omu lumbu yeto e vita ziwokela. Ediadi ‘dikatula luvuvamu ova nza.’—Lusengomono 6:4.

 Nkand’a Daniele wasakula vo “muna ntangw’a mbaninu,” tuyalu twangolo twa nz’amvimba ‘tununguziana,’ i sia vo, benuanina e wisa. Bevanga wo muna songa o nkum’a vu yau ya makesa yo sadila kimvuama ye nzimbu zayingi muna sumba yo vanga nkele miangolo.—Daniele 11:40, 42, 43.

 E Bibila kiasakula vo e mambu mampasi ova nza entete saka mesaka, i bosi metoma. Yesu wasakula vo: “Mukala mpasi zayingi zina ke zateka kala ko tuka kiasemenua e nza.” (Matai 24:21) E “mpasi zayingi” zifokokela muna vita eyi yiyikilwanga vo “Armangedo,” i sia vo, “vit’a lumbu kianene kia Nzambi a Mpungu-ngolo.”—Lusengomono 16:14, 16.

 E vita ya Armangedo inuanua muna vuluza wantu, kansi, ke kubafwasa ko. Muna vita yayi, Nzambi osukisa tuyalu twa wantu tutwasanga vita zibukumunanga o nkangu. Muna zaya una e vita ya Armangedo itwasila luvuvamu lwakwele mvu, tanga malongi malende:

•   “Nki i Vita ya Armangedo?”

•   “Armangedo i Nsangu Zambote kwa Yeto!”