ZINGU KIA KIKRISTU
Tatidilanga Nkanikinu mia Nkal’ambote mia Yave
Yave wa Nzambi wasikidisa e nkanikinu mia nkal’ambote mu kuma kia wantu. Kasikil’owu, Yave wasikidisa nkubik’a longo kimana nkento yo yakala bazinga entwadi. (Mat 19:4-6, 9) Osimanga mvukana zawonso za usafu. (1 Kor 6:9, 10) Yave ovananga nkutu e nkanikinu mu kuma kia mpila ya vuatila yo kuyikubika eyi iswaswanesanga nkangu andi.—Nsi 22:5; 1 Tim 2:9, 10.
O unu, wantu ayingi bebembolanga e nkanikinu mia Yave. (Roma 1:18-32) Belandanga e ngindu za wantu muna diambu ditatidi mvuatilu yo kuyikubika ye fu yau. Akaka betaninanga mavangu mau mambi yo vovela e mbi ya awana bezingilanga e ngwizani ye nkanikinu mia Nzambi.—1 Pet 4:3, 4.
Wau vo tu Mbangi za Yave, tufwete tatidilanga e nkanikinu mia nkal’ambote mia Nzambi. (Roma 12:9) Mu nkia mpila? Kuna ndekwa zawonso, tufwete zayisanga kwa akaka mana Yave keyangalelanga. Kansi oyeto mpe tufwete kitulanga e nkanikinu miami se mpila zingu kieto. Kasikil’owu, vava tusolanga e mpila mvuatu tuvuata yo kuyikubika, tufwete kukiyuvulanga: ‘Nga e mvuatu miame misonganga vo nkanikinu mia Yave ilemvokelanga yovo nza ilandanga? Nga e mpil’ame ya vuatila yo kuyikubika isonganga vo Nzambi ivuminanga?’ Vava tusolanga e programa za televizau yovo filme tutala, tufwete kukiyuvulanga: ‘Nga Yave oyangalela e programa yayi? Nkia fu inungununanga? Nga e nsaka isolanga zikululanga e fu yame ya nkal’ambote? (Nku 101:3) Nga zitesanga esi nzo ame e sakuba ye akaka?’—1 Kor 10:31-33.
Ekuma dinina diamfunu mu tatidila e nkanikinu mia nkal’ambote mia Yave? Ke kolo ko, Kristu Yesu ofwasa zula yo fokola o bi wawonso. (Yez 9:4-7) Awana kaka bevanganga luzolo lwa Nzambi bevuluka. (1 Yoa 2:15-17) Yambula twatadila e nkanikinu mia nkal’ambote mia Yave kimana awana bekutumonanga bakembelela Nzambi mu kuma kia mavangu meto mambote.—1 Pet 2:11, 12.
E mpil’ame ya vuatila yo kuyikubika, adieyi isonganga mu kuma kia mpila ibadikilanga e fu ya nkal’ambote?
NUTALA E VIDEO, KALA NKUNDI A YAVE—YAKALA DIMOSI, NKENTO MOSI, I BOSI NUVANA E MVUTU ZA YUVU ILENDE:
-
Ekuma dinina diangangu mu zingila e ngwizani ye nkanikinu mia Yave?
-
Ekuma mase bafwete yantikila longa wan’au e nkanikinu mia nkal’ambote mia Yave tuka muna kinsedia?
-
Aweyi aleke ye ambuta balenda sadisila o wantu mu vua nluta mia walakazi wa Nzambi?
