Nga ozolele kala ye lukwikilu lwasikila muna ntangw’a mpasi nze lwa Daniele? Daniele watoma longokanga Diambu dia Nzambi kumosi ye ungunza. (Dan 9:2) O kala ye fu kia longoka o Nkand’a Nzambi, dilenda kusadisa mu sikila ye kwikizi. Mu nkia mpila? Ediadi dilenda kusadisa mu kala ye lukwikilu lwasikila vo nsilu mia Yave milungana kikilu. (Yos 23:14) Dilenda mpe kusadisa mu wokesa o zola kwaku muna Nzambi yo kufila mu vanga oma mambote. (Nku 97:10) Kansi aveyi olenda yantikila? Badika mambu malende.

• Nkia mambu mfwete longoka? Tulenda longoka malongi ma lukutakanu. E ntangilu a Nkand’a Nzambi ilenda twasa nluta miayingi avo tuvawidi e ntangwa mu longoka mambu mana ke tubakwidi ko. Ankaka bemonanga vo diambote mu longoka ungunza wa Nkand’a Nzambi, fu ya mbongo a mwanda, nkangalu mia Paulu muna salu kiandi kia kimisionario yovo longoka oma ma nsem’a Yave. Avo kiuvu kia Nkand’a Nzambi oyindwidi, soneka kio kimana wavavulwila kio muna longi dia ngeye kibeni.

• Akweyi ndenda sololwela mambu ilongoka? Tala e video, Sadilwa ya Vavulwila Tusalu twa Mwanda, kimana wazaya una olenda wo vangila. Muna wokesa o umbakuzi waku, teza vavulula tuyalu twangolo tusunzulwanga kwa bulu iyikwanga muna kapu kia 7 kia nkand’a Daniele.

• Ola kwa ndenda viokesa muna longoka? O kala ye fu kia longoka i nsabi muna kala ye kimwanda kiambote. Olenda yantika muna vaulanga miniti miakete. Kuna kulanda, olenda kudikila e ola za longoka. O longoka Diambu dia Nzambi dina nze muntu ovavanga tusalu twaswekama. Ekolo kesololanga lusalu, e tima diandi dia vava diaka tusalu twakaka diwokelanga. (Nga 2:3-6) E tima diaku dia longoka e Diambu dia Nzambi diwokela, o tanga Nkand’a Nzambi lumbu yawonso ikala se mpila zingu kiaku.​—1 Pet 2:2.

• Dan 7:4

• Dan 7:5

• Dan 7:6

• Dan 7:7

LUYALU LWANGOLO LWA:

Aweyi e sono kia Daniele 7:8, 24 kialunganena?

KIUVU KIANKAKA:

E bulu iyikwanga muna Lusengomono kapu kia 13 nki isunzulanga?