Nze tukutakanu twawonso, o lukutakanu lwa salu kia umbangi luna se nkubik’a Yave eyi ikutusadisanga mu kasakesa muntu yo nkwandi. (Ayib. 10:24, 25) Lufwete vanga kaka miniti tanu yovo nsambwadi. Muna kati kwa miniti miami i mu fwete vangwa mawonso nze kubika e buka, yika e zunga kina ampangi bekwenda sadila yo samba. (Avo lukutakanu lwa salu kia umbangi luvangama ku nima lukutakanu lwankaka, lufwete kufikwa.) O mpangi ofila lukutakanu, kafwete kubika diambu dikasakesa awana bevaika mu salu kia umbangi muna lumbu kiakina. Kasikil’owu, avo ateleki ayingi ke bavaikidi ko mu salu kia umbangi muna kati kwa lumingu, muna lukutakanu lwa salu kia umbangi kina Kiasabala dilenda kala diambote mu yika kaka dina ateleki balenda vova kwa muntu bewanana yandi. Nkia mambu mankaka mamfunu tulenda badika?

• Sadila e nsunzula zaleboka zina muna Nkand’a Malongi, Zingu ye Salu Kieto kia Kikristu

• Una tulenda sadila e diambu diavangamene ke kolo ko yovo nsangu zampa muna yantika e moko

• Una tulenda vanina e mvutu kwa muntu utuzengele e mvovo

• Una tulenda vanina e mvutu kwa muntu ke kwikilanga mu Nzambi ko, kwa muntu okwikilanga muna lunungunuku, kwa muntu ovovanga ndinga yankaka yovo kwa muntu osambilanga mu dibundu ke dina muna zunga kieto ko

• Una tulenda sadila e salanganu ina muna jw.org, muna aplicativo JW Library^® yovo muna Bibila

• Una tulenda sadila e Salanganu Yeto ya Longela

• Una tulenda kukivanina muna mpila zankaka za sila umbangi nze, sila umbangi muna telefone, muna soneka nkanda, vana fulu kia ndonga, kingula o wantu yovo fila e longi dia Bibila

• Sungamesa ampangi o mfunu wa kuyitanina muna vonza, sobanga e ola ya kingula o wantu, songa fu yambote, kala ye ngindu zasikila yovo diambu diankaka

• Longi dimosi yovo video ina muna finkanda Tomesa e Mpil’aku ya Tangila yo Longa

• Una tulenda kasakesela yo sadisa o mpangi tuvaikidi yandi muna salu kia umbangi

• Sono kimosi kina ngwizani ye salu kia umbangi yovo diambu diakiese divangamene muna salu kia umbangi