Nkumbu miayingi wantu betambulwilanga e nsangu za Kintinu vava bewilanga zo muna nding’au a kingutukila. Nanga ekiaki i kuma muna Pentikosti ya mvu wa 33 T.K, Yave kafidila Ayuda “ana batuka muna zula yawonso ya nza,” mu wa e nsangu zambote ‘muna nding’au a kingutukila,’ kana nkutu awana bavovanga nding’a Kingerekia yovo Kiyibere. (Mav 2:5, 8) Muna zunga ivovuanga ndinga zayingi, e nkutakani zivovanga ndinga zaswaswana zilenda sadila mu zunga kimosi. Aweyi ateleki a nkutakani zazi balenda sadila kumosi muna sila umbangi kwa wantu awonso muna zunga lembi kubafungisa makasi?

• Mokena ye akaka (Nga 15:22): Akengi a salu bafwete toma mokenanga yo sala kumosi kimana vakala ye nkubika yambote isadisa e nkutakani zawonso zina muna zunga mu samuna e nsangu zambote una ufwene. Avo e zunga kiakete, e nkutakani zivovanga e ndinga zankaka balenda lomba vo twakingula kaka e nzo za wantu bevovanga e nding’eto. Kansi avo e zunga kiampwena ye ke belenda kio sadila ko, balenda lomba vo twakingula e nzo zawonso, avo tusolwele nkwa luzolo lwambote ona ovovanga e nding’au, tulenda kubazayisa. (od 5 93 tini kia 37) Balenda lomba mpe vo e nkutakani eno yabasadisa mu vava wantu bevovanga e nding’a nkutakani au yo soneka e fulu bezingilanga yo fila e nsangu muna nkutakani au. (km 7/12 5, babu) Sungamena dio vo, vena ye nzo zakaka zivovanga ndinga zayingi. E nkubika za sila umbangi muna zunga zifwete kala e ngwizani ye nsiku mia luyalu mitaninanga o wantu.

• Landa luludiku (Efe 4:16): Landa ye sungididi kiawonso konso luludiku oveno kwa nkengi a salu. Nga muntu olongakanga yandi ona kevovanga ndinga ya nkutakani aku ko? O nlongoki olenda nungunuka mu nzaki avo umvene kwa nkutakani ina lukufi yovo kwa buka kivovanga ndinga ina kevovanga.

• Kubama (Nga 15:28; 16:1): Avo owanane yo muntu ovovanga ndinga yankaka muna zunga, vanga mawonso muna kunsila umbangi. Olenda yindula wantu bevovanga ndinga zaswaswana olenda wanana yau yo bandula Bibila ye vídeo za ndinga zau muna telefone aku yovo tablet. Olenda mpe sadila aplicativo JW Language muna longoka una olenda kayisila o wantu muna ndinga zankaka.