Aneyisaele bakala ye kuma kiasikila mu kembelela Yave. Wabavaikisa muna Engipito yo kubavuluza vana moko ma makesa ma Faro. (Luv. 15:1, 2) Yamu wau Yave okwamanananga vanga oma mambote kwa nkangu andi. Aweyi tulenda songela luyangalalu lweto?—Nku. 116:12.

I mosi muna mpila tulenda wo vangila, i sala se mviti a nzila ansadisi yovo mviti a nzila a ngonde ke ngonde. Samba kwa Nzambi kimana kavana o luzolo ye nkuma wa sala se mviti a nzila. (Fili. 2:13) Ndonga beyantikilanga muna salu kia kimviti a nzila ansadisi. Olenda vanga ola 30 yovo 50 zivavuanga kwa aviti a nzila ansadisi muna ngonde ya Malusu ye Abidi ye muna ngonde a nkingul’a nkengi a zunga. Vava omona e kiese kia sala se mviti a nzila ansadisi, nanga ozola wokesa e salu kiaku muna sala se mviti a nzila a ngonde ke ngonde. Kana nkutu awana besalanga lumbu yawonso yovo awana ke bena yo vimpi wafwana ko, balenda kwau sala se aviti a nzila a ngonde ke ngonde. (mwb16.07 8) Kieleka, Yave yandi ofwene tambula nkembo wawonso.—1 Tus. 16:25.

TALA E VIDEO, MPANGI TATU ZA MONGÓLIA, I BOSI, VANA E MVUTU ZA YUVU ILENDE:

• Nkia nkakalakani bawanana zau mpangi tatu mu kota muna salu kia kimviti a nzila?

• Nkia nsambu batambula?

• Nkia malau mankaka batambula wau bakala se aviti a nzila a ngonde ke ngonde?

• E mbandu au aweyi yasadisila akaka?